Yogita chavan and Sourabh chougule : मराठी सिनेसृष्टीत अशी बरीच कलाकार मंडळी आहेत ज्यांनी आजवर कलाविश्वातील जोडीदाराची निवड केली आहे. अनेकांनी साखरपुडा समारंभ, लग्न समारंभ उरकत प्रेमाची कबुली दिली. बऱ्याच जणांचे सुखाचे संसार सुरु असलेले पाहायला मिळाले, तर काहींनी वेगळे होण्यासारखा मोठा निर्णय घेतला. अशातच आता मराठी मालिका विश्वातील एका कलाकार जोडीच्या वेगळे होण्याच्या चर्चांना उधाण आलं आहे. एक दीड वर्षांपूर्वीच लग्नबंधनात अडकलेल्या या कपलच्या नात्यात आता दुरावा आल्याचं म्हटलं जात आहे. ही कलाकार जोडी म्हणजे अभिनेता सौरभ चौघुले आणि अभिनेत्री योगिता चव्हाण.
योगिता चव्हाण आणि अभिनेता सौरभ चौघुले यांच्या नात्यात दुरावा आल्याच्या चर्चा सध्या सोशल मीडियावर रंगल्या आहेत. योगितानं तिच्या इन्स्टाग्राम अकाऊंटवरुन दोघांचे फोटो डिलीट केले तेव्हाच या चर्चा सुरु झाल्या. आता योगिताच्या अकाउंटवर सौरभबरोबरचा एकही फोटो पाहायला मिळत नाही आहे. फोटो डिलीट करण्यामागचं कारण अद्याप समोर आलेलं नाही, असं असलं तरी चाहत्यांमध्ये कुजबुज सुरु झाल्याचं पाहायला मिळत आहे.
आणखी वाचा – ‘वस्त्रहरण’कार गंगाराम गवाणकर यांचे निधन, मालवणी मनाच्या नाटककाराने ८६व्या वर्षी घेतला अखेरचा श्वास
सौरभने धनत्रयोदशीच्या दिवशी शेअर केलेल्या सोलो फोटोंच्या पोस्टने साऱ्यांचं लक्ष वेधलं. सौरभने शेअर केलेले हे फोटो गेल्या वर्षीच्या दिवाळीतील होते मात्र यावेळी त्याने योगिताबरोबर फोटो पोस्ट न करता एकट्याचेच फोटो पोस्ट केले आहेत. दिवाळीच्या शुभेच्छा देणाऱ्या पोस्टवर चाहत्यांनी सौरभकडे योगिताची विचारपूस केली. “योगिता आणि तुम्ही खूप दिवस झाले एकत्र दिसला नाहीत”, “तुझा डिवोर्स झालाय का?”, “बरेच दिवस झाले पाहून. सध्या कोणत्या चॅनलवर काम सुरु आहे. रिक्शावाली कशी आहे”,असे अनेक कमेंट केल्या आहेत.
सौरभ आणि योगिताने ३ मार्च २०२४ रोजी ‘आयुष्यभराचा हमसफर’ असं कॅप्शन देत लग्नबंधनात अडकल्याची सुखद बातमी दिली. आता ही जोडी लग्नाच्या दीड वर्षांनी एकत्र दिसत नसल्याने चाहत्यांमध्ये संभ्रमाचं वातावरण निर्माण झालं आहे. नक्की सत्य काय?, ते दोघे खरंच वेगळे झाले आहेत का याबाबत त्यांनी अधिकृतपणे काहीही सांगितलेलं नाही.
