‘कलर्स मराठी’ वाहिनी नेहमीच प्रेक्षकांच्या जवळच्या वाहिनीपैकी एक आहे. नेहमीच ही वाहिनी आशयघन असे विषय घेऊन नवनवीन कार्यक्रम वा मालिका प्रेक्षकांच्या भेटीस घेऊन येत असते. टीआरपीच्या शर्यतीतही ‘कलर्स मराठी’ वाहिनीवरील मालिका अव्वल स्थानावर असतात. अशातच एका नव्या मालिकेने ‘कलर्स मराठी’ वाहिनीवर एंट्री केली आहे. प्रेमाची परिभाषा मांडणाऱ्या या नव्या मालिकेच्या प्रोमोने साऱ्यांचं लक्ष वेधून घेतलं आहे. कारण या मालिकेत एका लोकप्रिय व मराठमोळ्या अभिनेत्रीची एंट्री पाहायला मिळणार आहे. (Spruha Joshi New Serial)
कलर्स मराठी वाहिनीवरील ‘सुख कळले’ या मालिकेत सिनेसृष्टीतील आघाडीची अभिनेत्री स्पृहा जोशी पाहायला मिळणार आहे. मराठी मनोरंजन विश्वातील स्पृहा ही लोकप्रिय अभिनेत्री आहे. चित्रपट, मालिका, नाटक या तीनही क्षेत्रातून या अभिनेत्रीने प्रेक्षकांची मन जिंकली. मराठीसह हिंदी सिनेसृष्टीतही स्पृहाने तिचा ठसा उमटविला आहे. तसेच स्पृहाने कवयित्री व सूत्रसंचालक म्हणूनही स्वतःची अशी एक वेगळी ओळख निर्माण केली.
कलर्स मराठी वाहिनीच्या ‘सूर नवा ध्यास नवा’ या कार्यक्रमाच्या सूत्रसंचालनाची धुरा स्पृहाने उत्तमरीत्या पेलवली. मात्र या कार्यक्रमाच्या मागील भागात ती दिसली नाही. त्यानंतर आता या मालिकेच्या माध्यमातून स्पृहाने मालिकाविश्वात कमबॅक केलं आहे. या मालिकेत स्पृहासह अभिनेता सागर देशमुख मुख्य भूमिकेत झळकणार आहे. याशिवाय स्पृहा व सागरबरोबर मिमी खडसे ही बालकलाकार देखील पाहायला मिळणार आहे. मालिकेच्या प्रोमोवरुन ही मालिका प्रेमाचे बंध फुलवणारी असल्याचं कळतंय.
‘एका लग्नाची दुसरी गोष्ट’, ‘उंच माझा झोका’, ‘एका लग्नाची तिसरी गोष्ट’, ‘अग्निहोत्र’ या मालिकांमधील स्पृहाची भूमिका विशेष गाजली. ‘लोकमान्य’ व ‘चंद्रविलास’ या दोन्ही मालिकांमध्ये स्पृहा व सागरची जोडी पाहायला मिळाली. मात्र टीआरपीच्या शर्यतीत या मालिका मागे राहिल्याने काही महिन्यातच ऑफ एअर झाल्या होत्या. आता पुन्हा एकदा सागर व स्पृहा एका नव्या मालिकेतून प्रेक्षकांच्या भेटीला येणार आहेत, ही मालिका केव्हा पाहायला मिळणार हे अद्याप गुलदस्त्यात ठेवण्यात आलं आहे.