‘बिग बॉस मराठी’ या बहुचर्चित कार्यक्रमामुळे प्रकाशझोतात आलेली अभिनेत्री म्हणजे सई लोकूर. या शोमध्ये सईचे विविध पैलु पाहायला मिळाले. तिने या कार्यक्रमादरम्यान प्रेक्षकांचं उत्तम मनोरंजन केलं. तसेच स्वतःचा एक वेगळा चाहता वर्गही निर्माण केला आहे. मात्र या शोनंतर ती तिच्या संसारामध्ये रमली. ‘बिग बॉस मराठी’नंतर सईने लग्न करत चाहत्यांना आनंदाची बातमी दिली. लग्नानंतर सई तिच्या संसारात रमली आणि तिने सिनेसृष्टीतून ब्रेक घेतला. (Sai Lokur Post)
२०२१मध्ये सईने तीर्थदीप रॉयबरोबर थाटामाटात लग्न केलं. तिच्या लग्नाची सर्वत्र जोरदार चर्चा रंगली. यांनतर सई व तीर्थदीप यांनी आई-बाबा झाल्याचीही आनंदाची बातमी दिली. अभिनेत्रीच्या गरोदरपणातील फोटोशूटने साऱ्यांचं लक्ष वेधलं होतं. सईने गेल्या वर्षी १७ डिसेंबरला गोंडस मुलीला जन्म दिला. त्यानंतर काही दिवसांनी तिने मुलीचं बारस केलं. सईच्या मुलीचं नाव ताशी असं आहे. ताशीचा अर्थ समृद्धी आणि शुभ असा होता.
सई तिच्या लेकीबरोबरचे अनेक फोटो, व्हिडीओ पोस्ट करताना दिसते. अद्याप सईने तिच्या लेकीचा चेहरा सर्वांसमोर आणला नाही आहे. त्यामुळे सगळ्यांना सईच्या लेकीला पाहण्याची उत्सुकता लागून राहिली आहे. सईच्या लेकीला आता सहा महिने झाले आहेत. सहा महिन्यानंतर लहान मुलांना अन्नप्राशन केलं जातं. आणि अन्न प्राशन कार्यक्रमही आयोजित केला जातो. सईनेही तिच्या लेकीचा हा अन्न प्राशन सोहळा आयोजित केला असल्याचं पोस्टद्वारे सांगितलं आहे.
सईने शेअर केलेल्या या पोस्टमध्ये तिने तिच्या नवऱ्याबरोबरचा फोटो पोस्ट केला आहे. “ताशीचा अन्नप्राशन सोहळा. माझं बाळ आजपासून जेवू शकणार”, असं कॅप्शन देत तिने या सोहळ्यातील खास फोटो शेअर केले आहेत. या फोटोंमध्ये सई व तिचा नवरा पारंपरिक अंदाजात दिसत आहे. सई तिच्या लेकीच्या आयुष्यातील या खास दिवसासाठी खूपचं खुश असल्याचं दिसत आहे.
