सध्या सोशल मीडिया हे जितके मनोरंजनाचे साधन म्हणून वापरले जाते, तितकेच ते समाजप्रबोधनाचे कामही करते. सोशल मीडियाच्या माध्यमातून अनेक कलाकार मंडळी समाजातील महत्त्वाच्या विषयांवर भाष्य करत असतात. मराठी मनोरंजन विश्वातील अनेक कलाकार आहेत, जे सामाजिक, राजकीय परिस्थितीवर अगदी खुलेपणाने भाष्य करतात. अशा काही कलाकारांपैकी एक अभिनेत्री म्हणजे प्राजक्ता माळी.
अभिनेत्री प्राजक्ता माळी ही नेहमीच सामाजिक, कला, राजकीय अशा विविध विषयांवर व्यक्त होत असते. अशातच तिने सोशल मीडियावर नुकत्याच केलेल्या एका पोस्टने सर्वांचे लक्ष वेधून घेतले आहे. प्राजक्ताने नुकतीच विरारमधील एका बालिकाश्रमाला भेट दिली असून अनाथ मुलींची सध्याची परिस्थिती व त्या मुलींचा सांभाळ याबाबत अभिनेत्रीने खास पोस्ट शेअर केली आहे.
प्राजक्ताने तिच्या इन्स्टाग्रामद्वारे एक खास व्हिडीओ शेअर केला आहे आणि हा व्हिडीओ शेअर करत तिने असं म्हटलं आहे की, “२ दिवसांपूर्वी नेटफ्लिक्सवर ‘भक्षक’ चित्रपट बघत होते आणि त्याच संध्याकाळी या बालिकाश्रमाला भेट देण्याचा योग आला. कधी कधी आपल्या शेजारच्या बिल्डींगमध्ये, चौकातील रस्त्यांवरील झोपड्यांमध्ये, आपल्या अवतीभवती काय चालू असतं याची आपल्याला अजिबात कल्पना नसते. अशाच काही भरकटलेल्या ठिकाणांहून या मुली इथे आल्यात आणि त्यांचा इथे चांगला सांभाळ होत आहे हे बघून बरं वाटलं.”
यापुढे प्राजक्ताने या पोस्टमध्ये असं म्हटलं आहे की, “तुमच्याही अवतीभवती अशा मुली असतील तर त्यांच्या मदतीसाठी पुढे या. विरारमधील या बालिकाश्रमाचा पर्याय तर खूलाच आहे.” यापुढे तिने या बालिकाश्रमाची सविस्तर माहिती देत “’भक्षक’ हा चित्रपट जरुर पाहा, म्हणजे मला नेमकं काय म्हणायचं आहे हे तुमच्या ध्यानात येईल. हा चित्रपट म्हणून अगदी उत्तम झाला आहे” असंही म्हटलं आहे.
आणखी वाचा – मन धागा धागा जोडते नवा! पूजा सावंत व सिद्धेश चव्हाण यांचा साखरपुडा सोहळा संपन्न, कलाकारांची गर्दी अन्…
दरम्यान, भूमी पेडणेकरची मुख्य भूमिका असलेला ‘भक्षक’ हा चित्रपट नुकताच प्रदर्शित झाला असून या चित्रपटाचे कथानक हे आश्रमात लहान मुलींवर होत असलेल्या अत्याचारावर आधारित असून मुख्य नायिका या मुलींची कशी सुटका करते? हे आहे.