Nirmiti Sawant ladki vihin yojana Natak : शासनाच्या योजना जनतेसाठी असतात, मात्र ही योजना थेट प्रेक्षकांच्या मनाला भिडणारी आहे. सुप्रसिद्ध अभिनेत्री निर्मिती सावंत मराठी रसिकांसाठी घेऊन येत आहेत ‘लाडकी विहीण योजना’. हसवण्याची, मन हलकं करण्याची आणि रोजच्या ताणतणावापासून क्षणभर विरंगुळा देणारी खास मनोरंजन योजना. योजनेचा उद्देश एकच भरपूर हशा आणि खळखळून हास्यविनोद. अष्टविनायक आणि पंचशील एण्टरटेन्मेंट निर्मित ‘लाडकी विहीण योजना’ लवकरच प्रेक्षकांच्या भेटीला येणार असून, या नाटाकाचे लेखन प्रथमेश शिवलकर यांनी केले असून दिग्दर्शन राजेश देशपांडे यांचे आहे. या नावात ‘योजना’ असली तरी यात कुठलीही कागदपत्रं, अटी-शर्ती नाहीत; आहे फक्त खुसखुशीत विनोद, मिश्किल संवाद आणि मराठी माणसाच्या दैनंदिन आयुष्यातील गंमती-जमतींचं जिवंत चित्रण.
कौटुंबिक वास्तवावर हलक्याफुलक्या शैलीत भाष्य करत ही योजना प्रेक्षकांना खळखळून हसवण्याचं काम करणार आहे. ‘ही कोणतीही शासकीय योजना नाही; ही पूर्णपणे रसिकांसाठीची मनोरंजन योजना आहे. नुकत्याच झालेल्या पत्रकार परिषदेत कलाकारांनी हे स्पष्ट केलं. अष्टविनायक संस्थेचे निर्माते दिलीप जाधव यांच्यासोबत नाटक करताना अनेकवेळा त्यांच्याकडे दिग्दर्शन आणि निर्मितीची इच्छा व्यक्त केली होती. योग्यवेळी तुला संधी देईन असं आश्वासन त्यांनी दिलं होतं. आज या नाटकाच्या निमित्ताने मला ही संधी दिली त्यासाठी अष्टविनायक संस्थेचे आणि दिलीप दादांचे मनापासून आभार मानतो असं सांगत, अभिनेता प्रसाद ओक यांनी ‘लाडकी विहीण योजना’ हे नाटक रसिकांना दिलखुलास आनंद देईल असा विश्वास व्यक्त केला.
आणखी वाचा – रश्मिका मंदान्ना आणि विजय देवरकोंडा यांच्यात श्रीमंत कोण? दोघेही पैसे कोठून कमवतात? जाणून घ्या…
निर्माता म्हणून हा आनंदाचा आणि समाधानाचा क्षण आहे. अष्टविनायक संस्था हे नावं आलं की, उत्तम आणि सकस हे अधोरेखित होतं. या नाटकाच्या निमित्ताने पंचशील एण्टरटेन्मेंट अष्टविनायक संस्थेशी जोडली जातेय याचा आनंद अभिनेता स्वप्नील जोशी ने व्यक्त केला. पहिलं सगळं नेहमीच खास असतं. एवढ्या सगळ्या मात्त्तबर मंडळींसोबत माझं पाहिलं व्यावसायिक नाटक येतयं याहून स्पेशल काही असू शकतं नाही, अशी भावना लेखक प्रथमेश शिवलकर यांनी बोलून दाखविली.
हसत-खेळत मनोरंजनाचा अनुभव देण्याचं आश्वासन देणाऱ्या या नाटकाच्या शुभारंभाचे प्रयोग गुरु ५ मार्च दु. ४.०० वा. प्रबोधनकार ठाकरे, बोरिवली, शुक्र ६ मार्च दु. ४. ०० वा. दीनानाथ नाट्यगृह, पार्ले शनि ७ मार्च दु. ४. ०० वा. यशवंत नाट्य मंदिर, माटुंगा रवि ८ मार्च दु. १. ०० वा. यशवंतराव चव्हाण, कोथरूड येथे होणार आहेत. निर्मिती सावंत यांच्या सोबत स्नेहा रायकर, पुर्णिमा अहिरे-केंडे, अधोक्षज कऱ्हाडे, सुनील जाधव, मुकेश जाधव आदी कलाकार मंडळी यात आहेत. ‘लाडकी विहीण योजना’ नाटकाचे निर्माते दिलीप जाधव, प्रसाद ओक असून सहनिर्माते स्वप्नील जोशी, मंजिरी ओक, तृप्ती पाटील, संजय मेमाणे आहेत. नेपथ्य प्रदीप मुळ्ये तर संगीत अजित परब यांचे आहे. प्रकाश योजना सुनील जाधव यांनी केली असून गीतं क्षितीज पटवर्धन यांनी लिहिली आहेत. गायिका राधिका भिडे यांचा स्वरसाज आहे. वेशभूषा पुर्णिमा ओक तर रंगभूषा मदन गायकवाड यांची आहे.सूत्रधार प्रणित बोडके आहेत.
