मराठी सिनेविश्वातील बरीच अशी कलाकार मंडळी आहेत जी अभिनयासह जोडधंदा, आवड वा विरंगुळा म्हणून इतर व्यवसायात विशेष लक्ष देतात. बरीच अशी कलाकार मंडळी आहेत ज्यांनी अभिनयासह स्वतःचा असा नवा व्यवसाय सुरु केला आहे. तर काहींनी व्यवसाय वा आवड म्हणून शेती करायलाही सुरुवात केली आहे. अशातच एका मराठमोळ्या अभिनेत्रीने तिच्या पतीबरोबर शेती हा व्यवसाय सुरु केला. महाबळेश्वर येथे फार्महाउस घेत ही जोडी तेथे शेती करु लागली आहे. ही अभिनेत्री म्हणजे मृण्मयी देशपांडे. (Mrunmayee Deshpande Husband Farming Photo)
मृण्मयीने आजवर तिच्या अभिनयशैलीने प्रेक्षकांच्या मनावर राज्य केलं आहे.सोशल मीडियावरही अभिनेत्री नेहमीच सक्रिय असते. कायम काही ना काही शेअर करत ती चाहत्यांच्या संपर्कात राहत असते. विशेषतः मृण्मयीचे तिच्या बहिणीबरोबरचे म्हणजेच गौतमीबरोबरचे बॉण्डिंग प्रेक्षकांना भावतं. देशपांडे सिस्टर्सची धमाल मस्ती नेहमीच चाहते सोशल मीडियावरुन एन्जॉय करतात.
मृण्मयी बहिणीबरोबच्या गमतीशीर व्हिडीओसह तिच्या फार्महाऊसमधीलही फोटो, व्हिडीओ पोस्ट करत असते. अभिनेत्री मृण्मयी देशपांडे आणि तिचा नवरा स्वप्निल राव या दोघांनी मिळून महाबळेश्वरमध्ये निसर्गाच्या सान्निध्यात एक छोटसं घर बांधलं आहे. त्यांचं हे ड्रीम होम पूर्ण झाल्यानंतर दोघांनी तिथे शेती करायला सुरुवात केली. स्वतःसाठी लागणारे अन्न, फळभाज्या यांचं पीक ते घेतात. मृण्मयी व स्वप्निल यांनी शेतीविषयक माहिती देतानाचे अनेक व्हिडीओ शेअर केले आहेत. मोकळी हवा, स्वत:साठी स्वत:च उगवलेलं अन्न, शहराबाहेरील शांतता आणि साधं राहणीमान या साऱ्याचा आनंद सध्या मृण्मयी घेताना दिसत आहे.
अशातच मृण्मयीचा नवरा स्वप्नील याने त्यांच्या शेतात कांद्याची शेती केली आहे. कांद्यांची कापणी केल्यानंतर त्याने एक फोटो शेअर करत याबाबतची माहिती शेअर केली आहे. “आमच्या कांद्याची कापणी सुरु झाली आणि कापणीमुळे खूप आनंद झाला. येत्या काही महिन्यांसाठी कांद्याचे चांगुलपण”, असं म्हणत त्याने हा फोटो पोस्ट केला आहे.