सध्या सोशल मीडिया हेदेखील एक मनोरंजनाचे साधन झाले आहे आणि या सोशल मीडियाचा वापर करत अनेकजण त्यांच्या चाहत्यांचे मनोरंजन करत असतात. मराठीतील अनेक कलाकार या सोशल मीडियावर त्यांचे अनेक मजेशीर व्हिडीओ शेअर करत चाहत्यांचे मनोरंजन करत असतात, यांपैकीच एक कलाकार म्हणजे अभिनेत्री क्रांती रेडकर. क्रांतीच्या लेकींच्या अनेक करामती ती सोशल मीडियावर व्हिडीओद्वारे चाहत्यांबरोबर शेअर करत असते आणि तिच्या या व्हिडीओला चाहत्यांकडूनदेखील उत्तम प्रतिसाद मिळत असतो. (Kranti Redkar On Instagram)
अशातच क्रांतीने नुकताच एक नवीन व्हिडीओ शेअर केला आहे आणि हा नवीन व्हिडीओ क्रांती किंवा तिच्या लेकींचा नसून समीर वानखेडे यांचा आहे. क्रांतीने शेअर केलेल्या या नवीन व्हिडीओमध्ये पती समीर वानखेडे हे त्यांच्या लेकींची काळजी करताना व त्यांच्याबरोबर काही खास क्षण घालवताना दिसत आहे. क्रांतीने त्यांच्या लग्नाच्या वाढदिवसानिमित्त हा खास व्हिडीओ शेअर केला असून या व्हिडीओखाली तिने पती समीर वानखेडे यांचं कौतुक करणारे छान कॅप्शनदेखील लिहिलं आहे.
हा व्हिडीओ शेअर क्रांतीने कॅप्शन देत असं म्हटलं आहे की, “प्रिय समीर, देवाने तुला माझ्या आयुष्यात पाठवल्याबद्दल मी त्याची आभारी आहे. आतापर्यंत पाहिलेला सर्वात शूर माणूस तू आहेस. मी तुला सर्व वादळांचा सामना करताना पाहिले आहे, ज्यात तु अजिबात डगमगला नाहीस. आजवर तू शांत राहिला आहेस. तू निधड्या छातीने सर्व आव्हांनाचा सामना केला आहेस. त्यामुळे तुझे फक्त नी फक्त चांगलंच होईल. कारण नशीब हे केवळ शूर व सत्यवादी लोकांसाठी अनुकूल असतं, त्यामुळेच तुम्ही केवळ लढाईच नाही, तर मोठं युद्धदेखील जिंकाल. सुवर्ण भारताचे स्वप्न तुम्ही एक दिवस पूर्ण कराल आणि त्या दिवशी मी आनंदाने, अभिमानाने तुमच्या बाजूला उभी असेन.”
यापुढे तिने असं म्हटलं आहे की, “छबिल व गोडो (क्रांतीच्या मुली) तुमच्याकडून खूप काही शिकत आहेत आणि माझ्या दोन्ही लेकी योग्य मूल्यांसह देशसेवेसाठी सज्ज होत आहेत. इतके व्यस्त असूनही तुम्ही मला अचूक १२ वाजता शुभेच्छा दिल्यात आणि याच छोट्या छोट्या गोष्टी माझ्यासाठी खूप महत्त्वाच्या आहेत.” दरम्यान, या व्हिडीओला नेटकऱ्यांनी लाईक्स व कमेंट्सद्वारे चांगलाच प्रतिसाद दिला आहे. तसेच अनेकांनी या व्हिडीओखाली क्रांती व समीर यांना लग्नाच्या वाढदिवसानिमित्त शुभेच्छादेखील दिल्या आहेत.