मराठमोळी अभिनेत्री क्रांती रेडकर ही कायमच कोणत्या ना कोणत्या कारणामुळे चर्चेत असते. सोशल मीडियावर क्रांतीचा वावर हा बऱ्यापैकी पाहायला मिळतो. ती नेहमीच तिच्या लेकींचे अनेक व्हिडीओ पोस्ट करत असते. क्रांतीला झिया व झायदा अशा दोन जुळ्या मुली आहेत. क्रांती तिच्या इन्स्टाग्राम अकाऊंटवरून कायमच या दोघींचे मजेशीर व्हिडीओ शेअर करत असते. बरं पण क्रांतीने अशातच दोन्ही लेकींचा एक व्हिडीओ सोशल मीडियावरून शेअर केला आहे. यामध्ये तिच्या एका लेकीला गंभीर दुखापत झाली असल्याचं सांगितलं आहे. (Kranti Redkar Post)
क्रांतीने इन्स्टाग्रामवर शेअर केलेल्या व्हिडीओ मध्ये तीच्या दोन्ही मुली झिया व झायदा दिसत आहेत. या व्हिडीओत झायदा ही झियाला चालण्यासाठी मदत करत असल्याचं दिसतंय. या व्हिडीओबरोबरच क्रांतीने त्यांच्या शाळेत घडलेला एक किस्साही सांगितला आहे.
क्रांती म्हणाली, “माझी मुलगी झिया हिला दुखापत झाल्याने तिच्या पायाला महिनाभर प्लास्टर करण्यात आलं होतं. आता ते काढलं असून ती चालायला शिकत आहे. ती खूपच धाडसी, संयमी व समजूतदार आहे. पण इथे आमची खरी हिरो ही मिस छबिल वानखेडे आहे, जी सावलीसारखी तिच्या पाठीशी उभी आहे.”
“आम्ही ओपन हाऊससाठी शाळेत गेलो होतो, तेव्हा मला शाळेतील कर्मचारी सांगत होते की, “झायदा किती करते झियासाठी. ती तिची काळजी घेते. तिच्या बॅगेतून पुस्तक काढणं ती भरुनही ठेवणं. जर ती वॉशरुमला गेली असेल तर ती बाहेर येईपर्यंत थांबते. तिचा टिफीन उघडून देते. झियाच्या पायाला प्लास्टर होते. पण असे असताना झायदा मात्र तिला प्रत्येक कामात मदत करत होती.”
“ओपन हाऊस झाल्यानंतर घरी आलो आणि आम्ही सर्वांनी दोन्ही मुलींसाठी उभे राहून टाळ्या वाजवत त्यांचे कौतुक केले. या कठीण काळात आम्हाला आनंदाने पुढे जाण्यासाठी दिलेल्या सर्व शक्तीसाठी मी देवाचे आभार मानते”, असे क्रांती रेडकरने म्हटले आहे.”