kishori shahane accident : अनेक कलाकार मंडळी रस्त्यांच्या दुरावस्थेवर भाष्य करताना दिसतात. ठाणे-घोडबंदर रोडवरील ट्राफिकवर तर अनेकदा चर्चा होताना दिसते. रस्ते अपघात तर हल्ली सर्रासपणे झालेले पाहायला मिळतात. अशातच आता एका मराठमोळ्या अभिनेत्रीचा कार अपघात झाला असल्याचं समोर आलं आहे. अभिनेत्रीने स्वतःच या कार अपघाताबाबत माहिती दिली आहे. मराठी आणि हिंदी चित्रपटसृष्टीतील लोकप्रिय आणि ज्येष्ठ अभिनेत्री किशोरी शहाणे यांच्या गाडीला ठाणे-मुंबई रस्त्यावर अपघात झाला आहे. शूटिंगनिमित्त प्रवास करत असताना त्यांच्या कारला दुसऱ्या एका वाहनानं धडक दिली.
सुदैवानं या घटनेत किशोरी शहाणे यांना कोणतीही गंभीर इजा झालेली नाही, मात्र त्यांच्या गाडीचे नुकसान झालं असल्याचं त्यांनी सांगितलं. सोशल मीडियावर व्हिडीओ शेअर करत किशोरी यांनी नेमकं काय घडलं ते सांगितलं. या धडकेमुळं किशोरी शहाणे यांच्या गाडीचा साईड मिरर पूर्णपणे तुटला आणि गाडीच्या दरवाजाचेही नुकसान झालं.
अपघाताबाबतची पोस्ट शेअर करत किशोरी यांनी म्हटलं की, “खरं तर सगळ्यांनाच पुढं जाण्याची घाई असते, मलाही आहे. पण तुम्ही इतके असंवेदनशील कसं असू शकता? कोणाच्या तरी गाडीला धडक बसतेय, त्यांचं नुकसान होतंय याकडं तुमचं लक्षही नसतं. मला त्या व्यक्तीचा खूप राग येतोय… अशा घटनांमुळं केवळ पैसा आणि वेळच वाया जात नाही, तर मनस्तापही प्रचंड होतो”, असं म्हणत किशोरी यांनी संताप व्यक्त केला. संबंधित व्यक्ती या अपघातानंतर तिथे थांबलीही नाही, याचा किशोरी शहाणे यांना अधिक मनस्ताप झाला.
