१४ फेब्रुवारी म्हणजेच प्रेमाचा दिवस. खरंतर फेब्रुवारी हा पूर्ण महिनाच प्रेमाचा महिना म्हणून ओळखला जातो. ‘व्हॅलेंटाईन डे’ चे औचित्य साधत अनेक जोडीदार आपल्या जोडीदारावरील प्रेम व्यक्त करतात. पण नुकत्याच एका मराठमोळ्या अभिनेत्याने कालच्या ‘व्हॅलेंटाईन डे’चे औचित्य साधत आपला साखरपुडा उरकला आणि हा मराठमोळा अभिनेता म्हणजे प्रथमेश परब. ‘टाईमपास’ फेम प्रथमेश परब व त्याची गर्लफ्रेंड क्षितिजा घोसाळकर यांच्या लग्नाची चर्चा गेले काही दिवस सुरू होती.
जानेवारी महिन्यात केळवणाचे फोटो शेअर करत अभिनेत्याने साखरपुडा व कालांतराने लग्नाची तारीख जाहीर केली होती आणि ठरल्याप्रमाणे काल (१४ फेब्रुवारी) रोजी प्रथमेश-क्षितिजा यांचा साखरपुडा सोहळा संपन्न झाला. त्यांच्या या साखरपुडा सोहळ्याचे खास फोटो सोशल मीडियावर शेअर करण्यात आले आहेत.
“आमचा व्हॅलेंटाईन डे असा साजरा झाला. आता इथून पुढे आयुष्यभराची साथ राहील” असं कॅप्शन देत प्रथमेशने-क्षितिजा यांनी त्यांच्या या साखरपुडा सोहळ्याचे खास क्षण सोशल मीडियावर चाहत्यांबरोबर शेअर केले आहेत. या खास सोहळ्यासाठी प्रथेमशने ऑफ व्हाईट रंगाची शेरवानी, तर क्षितिजाने जांभळ्या रंगाची सुंदर नक्षीकाम अशी पैठणी साडी नेसली होती.
प्रथेमशने त्याच्या गुडघ्यावर बसून अगदी फिल्मी स्टाईलमध्ये क्षितिजाच्या बोटात अंगठी घातली अन् त्यांचा हा साखरपुडा सोहळा संपन्न झाला. प्रथमेश-क्षितिजा यांच्या या साखरपुडा सोहळ्याला जवळचा मित्रपरिवार, नातेवाईक व मराठी कालाविश्वातील काही कलाकारांनीदेखील हजेरी लावली होती.
दरम्यान, प्रथमेश-क्षितिजा यांच्या साखरपुड्याच्या फोटोंवर चाहत्यांसह मराठी मनोरंजन विश्वातील अनेक कलाकार मंडळींनी शुभेच्छांचा वर्षाव केला आहे. तसेच प्रथमेश-क्षितिजाने सोशल मीडियावर एक खास पोस्ट शेअर करत साखरपुडा आणि लग्नाची तारीख जाहीर केली होती. त्याप्रमाणे १४ फेब्रुवारी रोजी त्यांचा साखरपुडा होणार असल्याचं त्यांनी सांगितलं होतं. त्यानंतर लगेचच १० दिवसांनी म्हणजेच १४ फेब्रुवारीला हे दोघे लग्नबंधनात अडकणार आहेत. त्यामुळे चाहत्यांना त्यांच्या लग्नाची उत्सुकता लागली आहे.