मराठी सिनेसृष्टीतील अभिनेता अमित खेडेकरला मातृशोक झाला आहे. १५ मे बुधवार रोजी अमित यांच्या आईचे निधन झाले. गेले कित्येक दिवस त्या कर्करोगाशी झुंज देत होत्या. अखेर त्यांची या आजाराशी सुरु असलेली झुंज संपली असून त्यांनी वयाच्या ६०व्या वर्षी अखेरचा श्वास घेतला. अमितने आईच्या निधनाची बातमी सोशल मीडियाद्वारे पोस्ट शेअर करत सांगितली. आईच्या निधनाने अमितवर दुःखाचा डोंगर कोसळला आहे. (Amit Khedekar Mother Death)
आईच्या निधनानंतर अमितला दुःख सहन होत नाही आहे. सोशल मीडियाद्वारे आईच्या निधनाची पोस्ट शेअर करत त्याने भावना व्यक्त केल्या आहेत. अमितच्या या पोस्टवर अनेकांनी कमेंट करत त्यांचं सांत्वन केलं आहे. अमितने सोशल मीडियावरुन पोस्ट शेअर करताच त्याला अनेकांनी धीर दिला आहे. पोस्ट शेअर करत अमितने असं म्हटलं आहे की, “हे सांगताना अत्यंत दुःख होत आहे की माझी आई सौ. सुनिता खेडेकर, १५ मे रोजी, रात्री १२.५० च्या सुमारास वयाच्या ६०व्या वर्षी या जगातून कायमची निघून गेली आहे. ती गेल्या काही काळापासून कर्करोगाशी झुंज देत होती”.
पुढे त्याने असं म्हटलं आहे की, “ती माझ्यासाठी आणि माझ्या कुटुंबासाठी सर्वस्व होती. तिच्या निधनाने माझे पूर्ण कुटुंबीय दुःखाच्या छायेत आहे. तिच्या जवळच्या लोकांपलीकडे ही माझ्या आईचा प्रेमळ प्रभाव आमच्या व्यापक समुदायावर पसरला आहे. ती नेहमी गरजूंना मदतीचा हात देण्यासाठी, अडचणी ऐकून घेण्यासाठी, दुःखात गरजूंना खांदा देण्यासाठी तयार असायची. तिच्या दयाळूपणाच्या आणि उदारतेच्या निःस्वार्थ कृत्यांनी अनेकांच्या जीवनाला स्पर्श केला आणि तिच्याबरोबर संपर्कात आलेल्या सर्वांवर एक अमिट छाप सोडली”.
“खरंतर तिच्या नसण्याने आमच्या आयुष्यात जी पोकळी निर्माण झाली आहे त्याचे वर्णन शब्दात करु शकत नाही. या कठीण काळात आमच्याबरोबर असलेल्या तुम्हा सर्वांचे आम्ही ऋणी आहोत. तिच्या आत्म्यास शांती लाभो हीच प्रार्थना”, असंही तो म्हणाला. अमितने आजवर अनेक मालिका व चित्रपटांमधून महत्वपूर्ण भूमिका साकारत प्रेक्षकांची मनं जिंकली आहेत.