Aadesh Bandekar Video : सध्या सर्वत्र विठू नामाचा जयघोष पाहायला मिळतोय निमित्त आहे जगतगुरु संत तुकाराम महाराज आणि संतश्रेष्ठ श्री ज्ञानोबा माउली यांच्या पालखी सोहळ्याचं. नुकतीच या मंगलमय सोहळ्याची सुरुवात झाली आहे. आळंदी, देहू येथे वारकरी संप्रदाय टाळ, मृदूंगासह मग्न झाले आहेत. या वारीत आनंदात रमलेले चेहरे सर्वत्र पाहायला मिळाले. विठूनामाचा या गजरात वारकऱ्यांसह मराठी चित्रपटसृष्टीतील अभिनेते आदेश बांदेकर देखील थिरकताना दिसले. देहू येथे सुरु असलेल्या पालखी सोहळ्यात आदेश बांदेकर टाळ मृदुगांच्या गजरात या पालखी सोहळ्यात रमून गेलेले दिसले. याची झलक त्यांनी त्यांच्या इंस्टाग्राम अकाउंटवर व्हिडीओ स्वरुपात पोस्ट केली आहे.
देहू आणि आळंदीवरुन तुकाराम महाराज आणि ज्ञानेश्वर माउली यांच्या पालख्या पंढरपूरच्या दिशेने निघून महाराष्ट्रभर वारीचा उत्साह सुरु झाला आहे. या उत्साहात आता कलाकार मंडळीही सामील झाले असल्याचं पाहायला मिळालं. स्टार प्रवाह वाहिनीवरील मालिकांमधील कलाकार या वारींमध्ये मनोभावे सेवा करताना दिसले. स्टार प्रवाहवरदेखील ‘ माऊली महाराष्ट्राची ‘ या कार्यक्रमातून पंढरपूरच्या वारीचे क्षण अनुभवता येणार आहेत. या कार्यक्रमाचे सूत्रसंचालन अभिनेते निर्माते आदेश बांदेकर करत असून त्यांनी देहू-आळंदीहून या प्रवासाला सुरुवात केली आहे.
आणखी वाचा – Video : आमिर खानचा लेक सलमान खानला भेटायला येताच बॉडीगार्डने धक्का मारत बाजूला काढलं अन्…; व्हिडीओ व्हायरल
वारीवेळी भरपावसात रेनकोट घालून आळंदीमधील अनुभव बांदेकर सांगताना दिसत आहेत. त्याठिकाणी मुसळधार पाऊस पडत असताना हे शूटिंग करण्यात आले. आदेश म्हणाले की, “पावसाला उधाण आलं आहे. इंद्रायणी नदी आता दुथडी भरुन वाहतेय, पण जितका उत्साह अन् प्रवाह या पाण्याचा आहे, त्यापेक्षा जास्त उत्साह आणि ऊर्जा आळंदीमध्ये अनुभवयाला मिळते आहे. प्रचंड पाऊस आणि त्यामध्ये हा भक्तीरसाचा आलेला महापूर!”, असं त्यांनी म्हटलं. डोक्यावर पंढरपुरी टोपी, कपाळीं अबीर गुलाल असा आदेश बांदेकर यांचा वारकरी लूक लक्षवेधी ठरतोय.
ज्ञानेश्वर माऊलींचा ७५० वा जन्मउत्सव असल्याने, यंदाचे वर्ष आणखी खास आहे. यावेळी आळंदीमधील एक व्हिडीओ सोशल मीडियावर तुफान व्हायरल होत आहे ज्यामध्ये रस्त्यावर आणि रस्त्याच्या दुतर्फा गर्दी पाहायला मिळत आहे. आणि त्या गर्दीतून एक रुग्णवाहिका वाट काढण्याचा प्रयत्न करत आहे. त्यावेळी आदेश बांदेकर, ‘ठरलं तर मग’चा अर्जुन (अभिनेता अमित भानुशाली) आणि ‘साधी माणसं’चा सत्या (अभिनेता आकाश नलावडे) यांनी त्या रुग्णवाहिकेसाठी मार्ग मोकळा करण्यास मदत केली. पावसामध्ये भिजत ही सर्व मंडळी काम करताना दिसली. चाहत्यांनी त्यांच्या या कृतीचे कौतुक केले आहे.
