Malaysian temple molestation : मलेशियामध्ये मूळच्या भारतीय असलेल्या मॉडेल आणि अभिनेत्री लिशालिनी कनारन हिने भारतीय पुजाऱ्याविरोधात गंभीर आरोप केले आहेत. सोशल मीडियावर एक मोठी पोस्ट शेअर करत लिशालिनीने तिचे दुःख सांगितले आहे. याचबरोबर तिने कोणत्या मंदिरात हे चुकीचे कृत्य तिच्याबरोबर केले गेले याचाही खुलासा केला आहे. गेल्या महिन्यात ती एकटीच मंदिरात गेली तेव्हा लिशालिनीला या वाईट कृत्याचा अनुभव आला. पुजाऱ्यांनी पवित्र पाण्याचे नाव घेऊन तिच्याबरोबर ही कृती केली असल्याचं समोर आलं आहे. लिशालिनी हिने तिच्याबरोबर घडलेली ही वाईट घटना सोशल मीडियावर शेअर केली आहे आणि संपूर्ण घटना उघडपणे सांगितली आहे. त्यांनी पोलिसात त्या पुजाऱ्या विरोधात तक्रारही केली असल्याचेही त्यांनी सांगितले.
लिशालिनीने आपल्या पोस्टमध्ये सांगितले आहे की, ही घटना २१ जून रोजी घडली आहे. जेव्हा ती एकटीच मंदिरात गेली होती. या वाईट कृत्याबाबत सांगत अभिनेत्री म्हणाली, “मी संपूर्ण आयुष्यात धार्मिक व्यक्ती नव्हते. उपासना करताना प्रार्थना कशी करावी आणि तेव्हा काय म्हणायचे हेदेखील मला माहित नव्हते. पण अलीकडेच, काही आठवड्यांसाठी मी मंदिरात जात होते आणि थोडेसे शिकत होते. २१ जून रोजी माझी आई भारतात होती, म्हणून मी एकटीच मंदिरात गेले. हे मंदिर आहे ज्यात मी नेहमी जात असे. एक पुजारी आहे जो सहसा मला विधींबद्दल सांगत असे, कारण मी या सर्वांमध्ये नवीन आहे”.
पुढे तिने म्हटलं की, “मला जास्त माहिती नाही आणि मी त्याच्या मदतीचे नेहमीच कौतुक केले. त्या दिवशी, जेव्हा मी प्रार्थना करीत होते, तेव्हा ते माझ्याकडे आले आणि म्हणाले की मला बांधण्यासाठी त्यांच्याकडे धागा आणि पवित्र पाणी आहे. ते सांगतील तसं मी करत होते पण कुठेतरी ते माझ्या मनाला पटत नव्हतं. त्याने मला कार्यालयात बसण्यास सांगितले आणि तो स्वत: उभा राहिला. त्याने पवित्र पाण्यात गुलाब किंवा फुलांच्या अर्कांसारख्या तीव्र गंध घातलं. ते म्हणाले की ते भारतातून आले आहे आणि सहसा ते सामान्य लोकांना असं देत नाही”.
पुढे अभिनेत्री म्हणाली, “ते सुगंधी पाणी ते माझ्या चेहऱ्यावर इतके शिंपडत होते की माझे डोळेसुद्धा उघडत नव्हते. त्यानंतर त्यांनी मला माझा पंजाबी ड्रेस काढण्यास सांगितला. जेव्हा मी नकार दिला, तेव्हा ते असे म्हणत राहिले की हे माझ्या चांगल्यासाठी आहे. जेव्हा मी त्यांना नकार दिला की मी ड्रेस उचलू शकत नाही कारण माझा ब्लाउज घट्ट आहे, तेव्हा ते माझ्यावर रागावू लागले. त्यानंतर ते माझ्यामागे उभे राहिले आणि माझ्यावर पाणी ओतण्यास सुरुवात केली. तो असे काहीतरी बोलत होता जे मला समजू शकले नाही. अचानक त्याने माझे डोके पकडले आणि बोलताना मला स्पर्श करण्यास सुरुवात केली. कोणताही इशारा न देता त्याने माझ्या ब्लाउजमध्ये हात घातला. आणि मला चुकीच्या पद्धतीने स्पर्श करण्यास सुरुवात केली”.
शेवटी, लिशालिनीने लिहिले की पोलिस अधिकाऱ्याने तिला सोशल मीडियावर ही गोष्ट शेअर न करण्याचा इशारा दिला होता. अन्यथा लोक त्यांना दोष देतील. मंदिराचे व्यवस्थापन हे दडपण्याचा प्रयत्न करीत असल्याचा आरोप लिशालिनीने केला आहे.
