‘कलर्स मराठी’ वाहिनीवरील ‘ढोलकीच्या तालावर’ या कार्यक्रमाचा काल मोठ्या दिमाखात महाअंतिम सोहळा पार पडला. त्याबरोबर अखेर महाराष्ट्रला २०२३ची नवी लावणी सम्राज्ञी मिळाली. महाराष्ट्राच्या कानाकोपऱ्यातून आलेल्या लावणी नृत्यांगनांनी यंदाचं ‘ढोलकीच्या तालावर’चं हे पर्व चांगलंच गाजवलं. उत्तम लावणी, दिलखेच अदा, पुणेरी ठसका असा अदांचा मिलाप यंदाच्या पर्वात पाहायला मिळाला. सुरुवातीपासूनच या स्पर्धकांमध्ये काट्याची टक्कर पाहायला मिळत होती. पण महअंतिम फेरीपर्यंत समता आमणे, नम्रता सांगुळे, पूर्वा साळेकर, तनुजा शिंदे, शुभम बोराडे आणि नेहा पाटील या लावण्यवती टिकून राहिल्या. मात्र या सहा स्पर्धकांमधून कोकणकन्या नेहा पाटील हीने बाजी मारत यंदाच्या ‘ढोलकीच्या तालावर’ या कार्यक्रमाचा विजेता होण्याचा मान पटकावला आहे. (Dholkichya talavar winner neha patil)
सुरुवातीपासूनच आपल्या मनमोहक अदाकारीने नेहाने सगळ्यांची मनं जिंकली. आपल्या जबरदस्त नृत्य कौशल्याच्या जोरावर सगळ्यांना घायाळ करत तिने ‘ढोलकीच्या तालावर’ हा किताब आपल्या नावावर केला. तर शुभम बोराडे या स्पर्धेचा प्रथम उपविजेता ठरला व नम्रता सांगुळे ही द्वितीय उपविजेता ठरली.
नेहा पाटीलच्या या स्पर्धेतील प्रवास सगळ्यांच्या लक्षात राहण्यासारखा होता. तिची कलेप्रती निष्ठा, कौशल्य, लावणी तंत्रावरील तिचं प्रभुत्व यामुळे स्पर्धेच्या सुरुवातीपासूनच तिने स्वतःची वेगळी ओळख निर्माण केली. तिचा प्रत्येक परफॉर्मन्स तिच्या परिपूर्णतेचं उदाहरण देत होता. तिने पारंपारिक लावणीला जपत आधुनिकतेचा तडका देत नवीन आविष्कार केले. तिने आपल्या अनोख्या नृत्यशैलीतून सगळ्यांची मनं जिंकत अखेर लावणी सम्राज्ञीचा मान पटकावला.
‘ढोलकीच्या तालावर’ या कार्यक्रमाच्या परिक्षणाची जबाबदारी अभिनेत्री क्रांती रेडकर, सुप्रसिद्ध दिग्दर्शक, निर्माते व लेखक अभिजित पानसे आणि ऩृत्य दिग्दर्शक आशिष पाटील यांच्याकडे होती. या कार्यक्रमाचं सूत्रसंचालन ‘बिग बॉस’ मराठीच्या चौथ्या पर्वाचा महाविजेता अभिनेता अक्षय केळकर याने केलं. आपल्या वेगळेपणातून त्याने या कार्यक्रमाला वेगळ्या उंचीवर नेलं.
