हल्ली सोशल मीडिया हेही मनोरंजनाचे एक साधन झाले आहे. सोशल मीडियाद्वारे अनेकजण वेगळ्या प्रकारचा कंटेट तयार करतात. मराठीतील अनेक कलाकारही सोशल मीडियाच्या माध्यमातून अभिनयाव्यतिरिक्त वेगळा कंटेट तयार करत प्रेक्षकांचे मनोरंजन करत असतात. अशा अनेक कलाकारांपैकी एक अभिनेत्री म्हणजे क्रांती रेडकर. क्रांती सोशल मीडियाच्या माध्यमातून तिचे अनेक फोटो व व्हिडीओ शेअर करत असते. त्याचबरोबर ती तिच्या लेकींचे मजेशीर व्हिडीओही पोस्ट करत असते. (Kranti Redkar On Instagram)
क्रांतीच्या लेकींच्या अनेक करामती ती सोशल मीडियावर व्हिडीओद्वारे चाहत्यांबरोबर शेअर करत असते आणि तिच्या या व्हिडीओला चाहत्यांकडूनदेखील उत्तम प्रतिसाद मिळत असतो. अशातच क्रांतीने नुकताच एक नवीन व्हिडीओ शेअर केला आहे. या व्हिडीओमध्ये क्रांतीच्या लेकींनी श्रीकृष्ण जन्माची कथा सांगितली आहे. क्रांतीने शेअर केलेल्या आपल्या लेकींचा हा व्हिडीओ सध्या सोशल मीडियावर चांगलाच चर्चेत आहे.
हा खास व्हिडीओ शेअर करत क्रांतीने असे म्हटले आहे की, “आमच्या घरी छबील व गोदोचे मित्र-मैत्रिणी शनिवारी खेळायला येणार आहेत आणि ही मुलं श्रीकृष्ण-गोविंद हा सुंदर खेळ खेळणार आहेत. श्रीकृष्ण-गोविंद म्हणजे श्रीकृष्णाचा जन्म ही मुलं रिक्रिएट करणार आहेत. यांच्यातील एक मुलगी यशोदा, एक देवकी, वासुदेव, एक नंद बनेल… यानंतर कृष्णजन्म होईल. पुढे बाळकृष्णाचं संगोपन माता यशोदा करेल. असं संपूर्ण नियोजन या मुलांनी करून ठेवलेलं आहे.” यादरम्यान, आईच्या मागे या व्हिडीओत छबीलदेखील श्रीकृष्ण जन्माची संपूर्ण कथा सांगताना पाहायला मिळत आहे. तसेच यापुढे व्हिडीओमध्ये तिने असे म्हटले आहे की, “शनिवारच्या या खेळात छबील देवकी, तर गोदो यशोदा बनणार आहे. यांच्याबरोबर या दोघींच्या सगळ्या मैत्रिणी सहभागी होतील. त्यामुळे आमच्या घराचं सुंदर असं नंदनवन तयार झालं आहे.”
या व्हिडीओखाली तिने व्हिडीओला साजेसं असं कॅप्शनदेखील लिहिलं आहे. यात तिने असं म्हटले आहे की, “आपल्या मुलांना या जुन्या गोष्टी व कथा समजावून सांगणं हे आजच्या काळात खूप महत्त्वाचं आहे. हे त्यांना सर्जनशील होण्यास मदत करते. आपल्या भारतमातेच्या संस्कृतीची त्यांना ओळख करून दिली पाहिजे. आणि हे फक्त देव-देवीपुरते मर्यादित नाही तर आपल्या स्वातंत्र्यसैनिकांबद्दलही त्यांना सांगितले पाहिजे. यामुळे भविष्यात त्यांना खरा मार्गदर्शक शोधण्यात मदत होईल.” दरम्यान, हा व्हिडीओ सोशल मीडियावर व्हायरल होत असून या व्हिडीओला नेटकऱ्यांनी लाईक्स व कमेंट्सद्वारे तुफान प्रतिसाद दिला आहे. तसेच क्रांतीच्या लेकींचे कौतुकही केले आहे.