गायक रोहित राऊत व गायिका जुईली जोगळेकर यांनी २०२२ मध्ये त्यांचा लग्नसोहळा उरकला. अगदी शाही थाटामाटात रोहितच्या व जुईली यांचा विवाहसोहळा उरकला. त्यानंतर रोहित व जुईली दोघेही संसाराला लागले. सोशल मीडियावरही रोहित व जुईली नेहमीच सक्रिय असतात. नेहमीच काही ना काही शेअर करत ते चाहत्यांच्या संपर्कात राहत असतात. दोघांचे अनेक धमाल, कॉमेडी व्हिडीओ कायमच प्रेक्षकांचं मनोरंजन करतात. (Rohit Raut Emotional Post)
रोहित व जुईली बऱ्याच कार्यक्रमांना एकत्र गायची मैफिल करताना दिसतात. दोघांनीही त्यांच्या गोड आवाजाने स्वतःचा असा चाहतावर्ग निर्माण केला आहे. शिवाय दोघेही सोशल मीडियावरुनही अनेकदा एकत्र गाणी गाताना दिसतात. रोहित व जुईली यांची अनोखी केमिस्ट्री कायमच प्रेक्षकांना भावते. सध्या जुईली तिच्या कामाच्या व्यस्त श्येड्युलमधून वेळात वेळ काढत काश्मीर येथे फिरायला गेली आहे. तेथे फिरतानाचे अनेक फोटो, व्हिडीओ ती तिच्या इन्स्टाग्राम अकाऊंटवरून शेअर करत आहे.
अशातच रोहितने शेअर केलेल्या एका पोस्टने साऱ्यांचं लक्ष वेधून घेतलं आहे. बायको घरी नसताना मस्ती-धमाल करु असा आपण विचार करतो पण सत्यात तसे घडत नाही असे म्हणत रोहितने एक पोस्ट शेअर केली आहे. या मध्ये बायको घरी नसताना कोणत्या समस्या येतात, कोणत्या भावना असतात अशा अनेक अडचणी त्याने लिहिलेल्या गाण्यातून मांडलेल्या पाहायला मिळत आहेत. या गाण्यासह त्याने “ठीक आहे, मला तुझी खूप आठवण येत आहे. आता घरी ये” असं कॅप्शन देत ही पोस्ट शेअर केली आहे. गाणं गाताना रोहितच्या डोळ्यात पाणी आलेलं ही पाहायला मिळालं.
रोहितच्या या पोस्टवर जुईलीने कमेंट करत, “फक्त २ दिवस, मी घरी येणार आहे. मग मी पूर्णपणे तुझ्याबरोबर असेन. तुला त्रास देण्यासाठी तुझे लाड करण्यासाठी, तुझ्या आजूबाजूला राहण्यासाठी, तुझ्या मिठीत झोपण्यासाठी मी तुझ्याकडे असेन. तुला माहित आहे की मी तुझ्यावर खूप प्रेम करते. तू गायलेलं हे गाणं मला फार आवडलं आहे” असं म्हटलं आहे. जुईलीच्या या कमेंटवर रोहितने प्रतिक्रिया देत, “माझं तुझ्यावर खूप प्रेम आहे” असं म्हटलं आहे.