बॉलिवूड अभिनेत्री जया प्रदा यांनी मनोरंजन विश्वासह राजकीय क्षेत्रातही आपली एक वेगळी ओळख निर्माण केली. मनोरंजन व राजकारणासह अभिनेत्री तिच्या वैयक्तिक आयुष्यामुळेही अनेकदा चर्चेत आली आहे. जया प्रदा यांनी ८०-९० च्या दशकात सिनेजगतात खूप नाव कमावले. चित्रपटसृष्टीनंतर त्यांनी राजकारणाच्या दुनियेतही प्रवेश केला आणि तिथेही त्यांनी आपला ठसा उमटवला. मात्र, मनोरंजन ते राजकारण या प्रवासात जया प्रदा यांना अनेक वादांनाही सामोरे जावे लागले.
जया प्रदा यांनी आपल्या कारकीर्दीमध्ये जवळपास २०० हून अधिक चित्रपटांमध्ये काम करत प्रेक्षकांचे मनोरंजन केले आहे. जया प्रदा यांनी धर्मेंद्र यांच्यापासून ते अमिताभ बच्चन यांच्यापर्यंत त्या काळातील सर्वच बड्या कलाकारांबरोबर धमाकेदार भूमिका केल्या. जया यांच्या करिअरची सुरुवात तेलुगू चित्रपटातून झाली असली तरी त्यांना खरी ओळख बॉलिवूडमधूनच मिळाली.
जया प्रदा या एकदा त्यांच्या वैयक्तिक आयुष्यात चांगल्याच चर्चेत आल्या होत्या. त्या जेव्हा लोकप्रियतेच्या व प्रसिद्धीच्या शिखरावर होत्या. तेव्हा त्यांचे नाव चित्रपट निर्माता श्रीकांत नाहटा यांच्याशी जोडले गेले होते. मात्र, दोघेही या नात्याला नेहमीच मैत्री म्हणत असत. नंतर २२ जून १९८६ रोजी जया प्रदा यांनी श्रीकांत नाहटाबरोबर लग्न केले. त्यावेळी नाहटा विवाहित होते आणि त्यांना तीन मुले होती. तरीही केवळ प्रेमाखातर जया प्रदा यांनी श्रीकांतबरोबर लग्न केले.
‘टाईम्स ऑफ इंडिया’च्या वृत्तानुसार, जया प्रदाबरोबर लग्न केल्यानंतरही नहाटा यांनी आपल्या पहिल्या घटस्फोट दिला नव्हता. याशिवाय त्यांनी जयाला आई होण्याचा आनंदही दिला नाही. त्यामुळे कालांतराने त्यांच्या नात्यात दुरावा निर्माण झाला आणि हळूहळू ते एकमेकांपासून वेगळे झाले. यानंतर जयाप्रदा यांनी आपल्या बहिणीच्या मुलाला दत्तक घेतले.
दरम्यान, जया प्रदा यांचे खरे नाव ललिता राणी होते, त्यांचा जन्म ३ एप्रिल १९६२ रोजी आंध्र प्रदेशमध्ये झाला होता. मनोरंजन सृष्टीत आल्यानंतर त्यांनी आपले नाव बदलून जया प्रदा ठेवले. जया यांनी वयाच्या अवघ्या १३व्या वर्षी सिनेविश्वात प्रवेश केला होता.
