Devdatta Nage new house : ‘जय मल्हार’ या मालिकेमुळे घराघरांत पोहोचलेले अभिनेते म्हणजे देवदत्त नागे. खंडेरायाच्या भूमिकेमुळे देवदत्त यांना खऱ्या अर्थाने लोकप्रियता मिळाली. त्यांनी आजवर हिंदी, मराठी, साऊथ सिनेविश्वात काम केलं आहे. पण ‘जय मल्हार’ मालिकेमुळे त्यांना खऱ्या अर्थाने लोकप्रियता मिळाली. सोशल मीडियावर ते बऱ्यापैकी सक्रिय असतात. सोशल मीडियाद्वारे ते त्यांचे अनेक फोटो, व्हिडीओ नेहमीच शेअर करतात. अशातच देवदत्त यांनी काही दिवसांपूर्वीच जेजुरीमध्ये जमीन खरेदी केली आणि लवकरच त्यांचं जेजुरीमध्ये घर घेण्याचं स्वप्नही ते पूर्ण करणार आहेत. या गोड बातमीनंतर देवदत्त यांनी जय मल्हार मालिकेदरम्यानच्या काही आठवणींना उजाळा देत खास पोस्ट शेअर केली आहे.
देवदत्त यांनी ‘जय मल्हार’ मालिकेच्या शूटिंगदरम्यानचे काही फोटो पोस्ट केले आहेत. आणि जुन्या आठवणींना उजाळा दिला आहे. त्यांनी काही खास फोटोंसह कॅप्शन देत असं म्हटलं आहे की, “‘जय मल्हार’चा पहिला भाग १८ मे २०१४ मध्ये प्रदर्शित झाला होता आणि माझा श्री खंडेरायांप्रति एक अलौकिक प्रवास सुरु झाला. मनात येईल तेव्हा श्री खंडेरायांच्या, म्हाळसाआई, बानूआईच्या दर्शनाला जायचो आणि आशीर्वाद घ्यायचो हा नियम होता. रात्री ११ला पॅकअप व्हायचं आणि तिथेच सेटवर स्नान करुन लगेच गाडीला स्टार्टर मारुन थेट माझी जेजुरी गाठायचो. मध्यरात्री साधारण ३ वाजता पोहोचायचो. मग ५-५:३० पर्यंत रस्त्यावरच गाडीमध्ये बसुन राहायचो. त्यानंतर श्री खंडोबाचं दर्शन आणि मग परतीचा प्रवास करायचो”.
नवीन घराबाबत ते म्हणाले, “श्री खंडोबाची प्रेमळ ओढ त्या दिवसांपासून अगदी आजपर्यंत तशीच आहे. गेली तीन-चार वर्ष वाटायला लागलं होतं की, तिथेच आपलं एक छोटंसं घर असावं; पण माझ्यासाठी हा खूप मोठा निर्णय होता. एक दिवस बारामतीहून जेजुरीकडे जाताना त्या पुलावरुन सहज लक्ष गेलं, तिथे काही प्लॉटिंग्स होते. त्या जागेवर जाऊन बघितलं, तर तिथून श्री खंडेरायांच्या जेजुरी गडाचं मनमोहक दर्शन घडलं. त्या दिवशी मित्र परिवारातील एका मित्राच्या दुकानाचं उदघाटन आटोपलं आणि माझा मित्र युवराजने सुचवलेल्या एका ठिकाणी मध्यरात्री राहिलो. पहाटे जाग आली, तेव्हा सहज त्या खिडकीतून लक्ष गेलं, तर समोर साक्षात जेजुरी गड आणि श्री खंडेरायांचं अलौकिक दर्शन. तेव्हाच जेजुरीमध्ये मानत येईल तेव्हा आणि जमेल तेव्हा वास्तव्य करायचं पक्क केलं”.
“सोन्याच्या जेजुरीमध्ये माझी बहीण सौ. अमृताताई आणि भावोजी श्री. संदीपजी घोणे यांच्या शुभ हस्ते आमच्या नवीन जागेचं भूमिपूजन केलं. तेव्हा आमचे डीलर डॉ. राजेश साठेसुद्धा उपस्थित होते. ते या उपयुक्त जागेसाठी ब्रँड अँबेसेडर शोधत होते आणि त्यांनी मला त्यासाठी विनंती केली. मी सुरुवातीला प्रांजळपणे नकार दिला; पण माझे जेजुरीचे जवळचे मित्र कन्हैया आणि प्रथमेश या दोघांनी डॉ. राजेश साठे खरंच चांगली व्यक्ती आहेत आणि त्यांच्यासाठी ब्रँड अँबेसेडर म्हणून काम करण्याचं सुचवले”.
अभिनेते शेवटी म्हणाले, “अशा प्रकारे श्री खंडेरायांच्या आशीर्वादानं माझं जेजुरीमध्ये घर होत आहे आणि जिथे माझं घर उभारत आहे, त्या पवित्र जागेचं ब्रॅण्डिंगही मीच हाताळत आहे. गेली १२ वर्ष मी न चुकता जेजुरीला श्री खंडेरायांच्या दर्शनाला येतोय. श्री खंडेरायांच्या चरणी माझी सेवा ते रुजू करुन घेत आहेत. त्याचंच हे फलित आहे, असं मला वाटतं. माझ्या जेजुरीतील मित्रांचे, कुटुंबाचे माझ्यावर असणारे प्रेम आणि श्री खंडेरायांची कृपा खरंच अलौकिक आहे. आज प्रदर्शित होणारा गोल्डन जेजुरीच्या जाहिरातीचा पहिला व्हिडीओ तुम्हाला आणि श्री खंडेरायांच्या चरणी समर्पित आहे”.
