Marathi actor house purchase : प्रत्येकाचं स्वतःचं घर असावं हे स्वप्न असतं. बरेचजण कामाच्या ठिकाणी आपलं घर व्हावं असा विचार करतात. घर घेण्यासाठी ही मंडळी दिवस-रात्र मेहनत करताना दिसतात. अनेक कलाकार मंडळीही त्यांचं घर घेण्याचं स्वप्न पूर्ण करताना दिसली आहेत. चाहत्यांसह ते आनंदाची बातमी वेळोवेळी शेअर करतात. बरेच असे कलाकार आहेत ज्यांनी मुंबईसारख्या झगमगत्या शहरात स्वतःच घर घेण्याचं स्वप्न पूर्ण केलं आहे. तर काहींनी सेकंड होम म्हणून गावाकडे वा एखाद्या शांत, निसर्गाच्या सान्निध्यात आपलं घर घेतलं आहे. अशातच आता एका मराठमोळ्या अभिनेत्याने घरासाठी नवी जागा घेतली आहे. हा अभिनेता म्हणजे जय मल्हार फेम देवदत्त नागे.
‘जय मल्हार’ या लोकप्रिय मालिकेतून घराघरांत पोहोचलेले अभिनेते म्हणजे देवदत्त नागे. देवदत्त नागे यांनी या मालिकेत साकारलेली देव खंडेरायाचीही भूमिका बरीच गाजली. आज मालिका संपून बरीच वर्ष झाली असली तरी खंडेरायाच्या भूमिकेतील देवदत्त यांना काही प्रेक्षक विसरु शकलेले नाहीत. याच देवदत्त यांनी त्यांनी साकारलेल्या खंडेरायाच्या जागेत म्हणजेच जेजुरीमध्ये घरासाठी जागा घेतली असून लवकरच ते नवं घर बांधणार आहेत. नुकताच त्यांनी भूमिपूजनाचे खास फोटो पोस्ट करत ही आनंदाची बातमी चाहत्यांसह शेअर केली.
देवदत्त यांनी पोस्ट शेअर करत, “येळकोट येळकोट…जय मल्हार. श्री खंडेरायांच्या कृपेने साक्षात श्री खंडेरायांच्या सान्निध्यात माझे स्वतःचे घर जेजुरीमध्ये. श्री खंडेरायांच्या चरणी माझी सेवा रुजू झाली हे माझे परम भाग्य. माझी बहिण सौ.अमृता ताई आणि माझे भाऊजी श्री. संदिपजी घोणे यांच्या शुभ हस्ते भूमी पूजन. आणि जिथे घर उभे राहणार आहे तिथे श्री खंडेरायांचे जागरण गोंधळ म्हणजे केवळ आनंद. सदानंद. बा. श्री. खंडोबा. आता मनामध्ये येईल तेव्हा मला तुझ्या सान्निध्यात राहायला मिळणार. तुझी सेवा माझ्याकडून निरंतर घडणार. माझ्याकडून तुझी सेवा अशीच घडू दे रे बा. सदानंदाचा येळकोट… येळकोट येळकोट… जय मल्हार”, असं म्हटलं.
यावेळी त्यांनी त्यांच्या जेजुरी येथे खरेदी केलेल्या जमिनीच्या भूमिपूजनाचा व्हिडीओ शेअर केला आहे. देवदत्त यांची ही पोस्ट पाहून अनेक चाहत्यांनी त्यांच्यावर शुभेच्छांचा वर्षाव केला आहे. “असं वाटतं साक्षात खंडोबा महाराज जेजुरीत राहायला येणार”, “येळकोट येळकोट जय मल्हार”, “सर आपली भेट कधी होणार खंडोबालाच माहीत”, अशा कमेंट चाहत्यांनी त्यांच्या या पोस्टवर केल्या आहेत.
