Paus 2 Webseries trailer : ‘इट्स मज्जा’ हे चॅनेल नेहमीच नवनवीन कंटेंट घेऊन येत रसिकांच्या मनात घर करतं. मनोरंजनाच्या बाबतीत तर ‘इट्स मज्जा’ हे चॅनेल कुठेच कमी पडलेलं नाही. या चॅनेलचा खूप मोठा चाहतावर्ग आहे. या चॅनेलमार्फत आलेल्या ओरिजिनल सिरीज नेहमीच प्रेक्षकांच्या मनात घर करुन राहतात. यांत ‘आठवी-अ’, ‘दहावी-अ’, ‘पाऊस’ ‘मैत्रीचा सातबारा’, या वेबसिरीजची नाव घेणं वावगं ठरणार नाही. प्रत्येक एपिसोडला मिलियन व्ह्यूज मिळवत या सिरीज जगभरात लोकप्रिय आहेत. आणि प्रत्येक सिरीजचा असा स्वतःचा चाहतावर्ग आहे. आता या चाहत्यावर्गासाठी ‘इट्स मज्जा’ ‘पाऊस २’ ही नवी सिरीज घेऊन येत आहे.
नुकताच पाऊस २ चा ट्रेलर रसिकांच्या भेटीस आला. पोस्टर आल्यानंतर यांत ‘पाऊस’ सिरीजमधील कलाकार असतील असा प्रेक्षकांचा अंदाज होता. मात्र, तसं न होता ‘पाऊस २’ मुळे एक नवोदित जोडी या सिरीजमुळे सिनेविश्वाला मिळाली आहे. पाऊस २ मध्ये अभिनेत्री कादंबरी माळी आणि अभिनेता तेजस कवार ही नवी जोडी दिसणार आहे. समोर आलेल्या ट्रेलरमध्ये दोघांच्या अभिनयाची धमाकेदार झलक पाहायला मिळाली. अर्थात सुंदर अशा निरसर्गरम्य वातावरणात सुरु झालेला हा रोमँटिक प्रवास ट्रेलरच्या सुरुवातीलाच मन जिंकतोय.
आणखी वाचा – अखेर ‘ठरलं तर मग’मध्ये पूर्णा आजी परतल्या, अभिनेत्री रोहिणी हट्टंगडी साकारणार ही भूमिका, पहिला फोटो समोर
मात्र, ट्रेलरच्या मध्यात “प्रत्येकाचा पाऊस वेगळा असतो तसं प्रत्येकाचं भिजणंही वेगळं असतं” या अभिनेत्रीच्या वाक्याने पूर्ण कथेत ट्विस्ट आला. या वाक्यानंतर ट्रेलरमध्ये दोन प्रेमीयुगुलामधील फूट पाहायला मिळतेय. नायक आणि नायिकेच्या नात्याला कुटुंबाकडून, गाववाल्यांकडून मिळालेला नकार पाहता सिरीजमध्ये नेमकं काय घडणार ही उत्सुकता वाढवतंय.
‘मीडिया वन सोल्युशन’ प्रस्तुत आणि ‘इट्स मज्जा ओरिजिनल सिरीज’ ‘पाऊस २’ या सिरीजच्या निर्मितीची धुरा निर्माते शौरिंद्र नाथ दत्ता यांनी उत्तमरीत्या पेलवली आहे. तर दिग्दर्शनाची बाजू दिग्दर्शक नितीन पवार यांनी सांभाळली आहे. तर प्रोजेक्ट व क्रिएटिव्ह हेड अंकिता लोखंडे या आहेत. या सिरीजची पटकथा नितिन पवार-नितिन वाडेवाले यांची असून संवाद नितीन पवार यांनी लिहिले आहेत. सिरीजचे पार्श्वसंगीत व संगीत संयोजक मंदार पाटील असून चित्रपटातील गाणी गायक ओंकारस्वरुप आणि गायिका आचल ठाकूर हिने त्यांच्या सुमधुर आवाजात स्वरबद्ध केली आहेत.
