atul parchure : मराठी व हिंदी या दोन्ही मनोरंजनसृष्टीत आपलं नाणं खणखणीत वाजवत प्रेक्षकांच्या मनात अढळ स्थान निर्माण करणारे अभिनेते म्हणजे दिवंगत अभिनेते अतुल परचुरे. आजही त्यांच्या कलाकृती प्रेक्षकांच्या मनात जिवंत आहेत आणि पुढेही राहतील. अतुल परचुरे यांचं लहानपण दादरमध्ये गेलं. लहानपणापासूनच त्यांना क्रिकेटची प्रचंड आवड होती. मित्रांसह ते नेहमीच क्रिकेट खेळायचे. खरंतर त्यांना अभिनेता नाही, तर क्रिकेटर व्हायचं स्वप्न होतं. पण काही काळानंतर त्यांना जाणवलं की, या क्षेत्रात यशस्वी व्हायचं असेल तर खूप मेहनत घ्यावी लागेल आणि ती ते घेऊ शकणार नाहीत. त्यामुळे त्यांनी क्रिकेटचं स्वप्न बाजूला ठेवलं.
अभ्यासातही त्यांची फारशी आवड नव्हती, पण एक गोष्ट मात्र त्यांना कायम आवडायची ती म्हणजे अभिनय. शालेय नाट्यस्पर्धांमध्ये ते नेहमी भाग घ्यायचे. चौथीत असतानाच त्यांनी पहिल्यांदा टेलिव्हिजनवर काम केलं, आणि नंतर व्ही. शांताराम यांच्या बालचित्रपटातही झळकले. यानंतर काही काळ त्यांनी बँकेत नोकरी केली, जवळपास पाच ते सहा वर्षं. पण नियतीने त्यांच्यासाठी काहीतरी वेगळंच ठरवलं होतं. त्यांच्या आयुष्यात मोठं वळण आलं ते म्हणजे ‘व्यक्ती आणि वल्ली’ नाटक.
आणखी वाचा – अखेर हास्यजत्रेत परतला ओंकार भोजने, पहिला प्रोमो समोर, प्रेक्षकही खुश, म्हणाले, “दिवाळीचा बोनस…”
या नाटकात त्यांनी साकारलेली पु. ल. देशपांडे यांची भूमिका प्रेक्षकांच्या मनात आजही घर करुन आहे. पण ही भूमिका त्यांना मिळाली कशी, हे ऐकून तुम्ही थक्क व्हाल. अतुल परचुरे यांनी एका मुलाखतीत सांगितलं होतं, “मी तरुण होतो तेव्हा माझं व्यक्तिमत्व आणि दिसणं थोडं पु. ल. सारखं होतं. त्यामुळे ‘व्यक्ती आणि वल्ली’च्या निर्मात्यांनी मला ही भूमिका देण्यापूर्वी, थेट पु. ल. देशपांडेंनाच विचारलं. ही भूमिका अतुलला देता येईल का? आणि पु. ल.नी लगेचच ‘हो’ म्हटलं!” हे ऐकताच अतुल परचुरे यांनीही तत्काळ ‘व्यक्ती आणि वल्ली’साठी होकार दिला आणि तेथून त्यांच्या अभिनय प्रवासाची खरी सुरुवात झाली.
आणखी वाचा – Filmfare मिळताच छाया कदम यांच्या डोळ्यात पाणी, मंचावर शाहरुख खानने दिला धीर अन्…; व्हिडीओ व्हायरल
यानंतर त्यांनी सिनेमा, नाटक आणि मालिका या तिन्ही माध्यमांतून उत्कृष्ट कामगिरी केली. विशेष म्हणजे, त्यांनी शाहरुख खानची पहिली निर्मिती असलेला ‘दिल है हिंदुस्तानी’ या हिंदी चित्रपटातही भूमिका साकारली होती. परंतु पुढे त्यांनी कर्करोगाशी कठीण झुंज दिली. पहिली सर्जरी यशस्वी झाली नाही, तरीही त्यांनी हिम्मत सोडली नाही. पण नशिबाने डाव पलटवला आणि १४ ऑक्टोबर २०२४ रोजी त्यांनी या जगाचा निरोप घेतला. आज त्यांच्या निधनाला एक वर्ष पूर्ण झालं आहे. पण अतुल परचुरे यांच्या आठवणी, त्यांचा अभिनय, आणि त्यांचं स्मितहास्य आजही प्रेक्षकांच्या मनात तितकंच जिवंत आहे.
