Nupur Shikhare and Ira Khan Marriage : बॉलिवूड परफेक्शनिस्ट आमिर खानच्या लेकीचा शाही विवाहसोहळा उरकताच मुंबईत त्यांच्या भव्य रिसेप्शन सोहळ्याचे आयोजन करण्यात आले होते. मुंबईतील जियो वर्ल्ड येथे हा भव्यदिव्य सोहळा संपन्न झाला. याचे अनेक फोटो, व्हिडीओ सोशल मीडियावर चांगलेच व्हायरल होताना पाहायला मिळाले. या सोहळ्याला सिनेसृष्टीतील अनेक दिग्गज मंडळींनी, तसेच कलाकारांनी हजेरी लावून या सोहळ्याची रंगत वाढविली.
आयरा खान व नुपूर शिखरे त्यांच्या रिसेप्शनवेळी परिधान केलेल्या खास लूकमध्ये जबरदस्त दिसत होते. इराने परिधान केलेला लाल रंगाचा डिझाइनर लेहेंगा व ब्लाउज खास दिसत होता. तर काळ्या रंगाची शेरवानी परिधान केलेला नुपूर एका देखण्या राजकुमारासारखा दिसत होता. तर बॉलिवूड परफेक्शनिस्ट आमिर खान लेकीच्या लग्नात काळ्या रंगाच्या नवाबी पोशाखात पाहायला मिळाला. लेकीच्या रिसेवशां सोहळ्याला आलेल्यांची उठबस करतानाही तो दिसला. लेकीच्या लग्नासाठी आमिर खान एकूणच आनंदी असलेला पाहायला मिळाला.
भाईजान सलमान खानही या नवविवाहित जोडप्याला आशीर्वाद देण्यासाठी काळ्या रंगाच्या थ्री-पीस सूटमध्ये आला आणि त्याच्या स्वॅगने त्याने केलेली एंट्री लक्षवेधी ठरली. कतरिना कैफनेही आयराच्या रिसेप्शन सोहळ्याला हजेरी लावली होती. कतरीनाने परिधान केलेला भव्य मॉडर्न व पारंपरिक टच असलेला लेहेंगा सेट खूप सुंदर होता. रणबीर कपूरने त्याचा मित्र आमिरच्या मुलीच्या रिसेप्शनला उपस्थित राहण्यासाठी ऑफ व्हाईट रंगाचा आकर्षक पोशाख परिधान केला होता. आयराच्या रिसेप्शन पार्टीला वेलकम अभिनेता अनिल कपूर आणि दाक्षिणात्य स्टार नागा चैतन्य देखील उपस्थित होते. दोन्ही अभिनेत्यांनी पोज देत एकमेकांना शुभेच्छा दिलेल्याही पाहायला मिळाल्या. तसेच जया बच्चन व लेक श्वेता बच्चनही या सोहळ्याला उपस्थित होत्या. नेहमीप्रमाणे यावेळी ही जया बच्चन पापराजींवर भडकताना दिसल्या.
लिन लैश्राम व रणदीप हुडा हे नवविवाहित जोडपं आशीर्वाद देण्यासाठी या सोहळ्याला उपस्थित होते. तर काळ्या रंगात फरहान अख्तर व शिबानी दांडेकर यांचा मॅचिंग ड्रेसकोड साऱ्यांचं लक्ष वेधून घेत होता. याशिवाय बॉलिवूडपासून ते साऊथ इंडस्ट्रीपर्यंतचे अनेक कलाकार या भव्य रिसेप्शनमध्ये सहभागी झाले होते. सचिन तेंडुलकर, अनिल कपूर, नागा चैतन्य, हेमा मालिनी, जया बच्चन, राज ठाकरे, बाबिल खान, सोनाली बेंद्रे, सूर्या यांसारख्या अनेक कलाकारांची मांदियाळी पाहायला मिळाली.
