प्रत्येक मध्यमवर्गीय कुटुंबातील मुलाचे स्वप्न असते की, आपल्या आई-वडिलांचे स्वप्न पूर्ण करावे आणि या स्वप्नपूर्तीसाठी प्रत्येक जण मेहनत घेत असतो. असंच एक बाबांच्या इच्छेसाठी गाडी घेण्याचं स्वप्न होतं गौरव मोरेचं. ‘महाराष्ट्राची हास्यजत्रा’ या कार्यक्रमामुळे अभिनेता गौरव मोरे अगदी घराघरांत लोकप्रिय झाला. महाराष्ट्राची हास्यजत्रा या कार्यक्रमामुळे गौरवला अमाप लोकप्रियता मिळाली. अशातच त्याने ‘मॅडनेस मचाएंगे’ या हिंदी कॉमेडी शोमध्ये हजेरी लावली.
या शोमध्ये त्याने त्याच्या बाबांच्या गाडी घेण्याच्या स्वप्नाबद्दल सांगितले होते. याबद्दल गौरवने असं म्हटलं होतं की, “बाहेर फिरायला जाताना, नेहमी असं वाटायचं की, आपल्याकडे पण गाडी असली पाहिजे होती. बस, ट्रेनचा प्रवास मला नक्कीच आवडतो. मी आताही तसा प्रवास करू शकतो. पण माझे वडील नेहमी बोलायचे आपल्या घरात चारचाकी पाहिजे. तेव्हापासून मी ठरवलं होतं की, सेकंड हँड असली तरीही आपल्या घरात चारचाकी गाडी आली पाहिजे. कारण लोकांना ज्याच्या घरासमोर कार असते तोच माणूस मोठा वाटत असतो.”
याबद्दल पुढे त्याने असं म्हटलं की, “मी एका शोमध्ये काम करत होतो. तिथे काम करून मी पैसे साठवले आणि गाडी घ्यायचं ठरवलं. गाडी घ्यायचं ठरवलं तेव्हा समोरचा माणूस बोलला दीड लाखात कार देईन. तेव्हा मी त्याला “माझ्याकडे फक्त १ लाख १० हजार आहेत त्याच्यापेक्षा जास्त काहीच नाही”. असं म्हटलं होतं. बाबांची इच्छा होती म्हणून गाडी घेतली. त्यानंतर गाडी आली पण बाबा गेले. केव्हा-केव्हा वाईट वाटतं आज माझे बाबा सोडून सगळेजण माझ्या गाडीत बसतात. पण ठीक आहे. आता नवीन गाडी घेतल्यावर मी बाबांचा फोटो गाडीत ठेवेन. चला असे तरी एकत्र फिरुया असा विचार करून मी माझं समाधान करून घेतो”.
दरम्यान, विनोदाचं अचूक टायमिंग साधत संपूर्ण महाराष्ट्रातील प्रेक्षकांच्या मनावर अधिराज्य गाजवणारा लोकप्रिय अभिनेता म्हणून गौरव मोरेला ओळखलं जातं. मराठीशिवाय तो हिंदी कलाविश्वात स्वत:ची वेगळी ओळख निर्माण करत आहे. ‘मॅडनेस मचाएंगे’ या हिंदी कॉमेडी शोमध्ये गौरव प्रेक्षकांना खळखळून हसवत आहे.