Actress Hina Khan Health Update : टेलिव्हिजन विश्वातील लोकप्रिय अभिनेत्री हिना खानबाबत एक धक्कादायक बातमी समोर आली आहे. हिना खान स्तनाच्या कर्करोगाशी झुंज देत असल्याचं समोर आलं आहे. अभिनेत्री कर्करोगाच्या तिसऱ्या टप्प्यात आहे. याबाबतची माहिती तिने स्वतः सोशल मीडियावरुन चाहत्यांबरोबर शेअर केली आहे. सोशल मीडिया पोस्ट शेअर करताना अभिनेत्रीने सांगितले की, तिच्यावर उपचार सुरु झाले आहेत. आणि सर्वांच्या प्रेमाबद्दल ती आभारी आहे. नुकतीच बातमी आली की हिना खान कॅन्सरने ग्रस्त आहे, पण या बातमीवर क्वचितच कोणी विश्वास ठेवला असेल. मात्र आता जेव्हा अभिनेत्रीने स्वतः तिच्या कर्करोगाचे निदान उघड केले तेव्हा सर्वांनाच धक्का बसल्याचे दिसत आहे.
स्तनाच्या कर्करोगाबद्दलबद्दल बोलताना अभिनेत्रीने लिहिले, “माझ्याबद्दल काही अफवा पसरत आहेत. मला एक महत्वाची बातमी तुम्हा सर्वांसह शेअर करायची आहे”. पुढे तिने लिहिलं आहे की, “विशेषतः जे माझ्यावर प्रेम करतात. माझी काळजी घ्या. मला स्तनाचा कर्करोग आहे. हा कर्करोग तिसऱ्या टप्प्यात आहे. त्यावर उपचार सुरु झाले आहेत. बऱ्याच समस्यांना तोंड देत असूनही मी तुम्हा सर्वांना खात्री देते की मी ठीक आहे. या आजाराशी लढण्यासाठी मी पूर्णपणे तयार आहे. यावेळी, मी स्वतःला मजबूत ठेवण्यासाठी सर्वकाही करण्यास तयार आहे”.
ब्रेस्ट कॅन्सरबद्दल बोलताना हिना म्हणाली की, यादरम्यान सर्वांनी खासगी आयुष्यातील गोपनीयतेचा आदर करावा. ती म्हणाली, “मला तुमच्या प्रेमाचा, आदराचा अभिमान आहे, पण यावेळी आमच्या गोपनीयतेची काळजी घेतली गेली पाहिजे. मला व माझ्या कुटुंबाला विश्वास आहे की मी कॅन्सरची लढाई जिंकून लवकरच बरी होईन. पण तोपर्यंत थोडी काळजी घ्या. यावेळी मला तुमच्या प्रेमाची व प्रार्थनांची खूप गरज आहे”.
