Dipika Kakar Health : टेलिव्हिजन अभिनेत्री दीपिका कक्करच्या चाहत्यांसाठी अत्यंत वाईट बातमी आहे. अभिनेत्रीने स्वतः तिच्या तब्येतीबाबत माहिती दिली आहे. बरेच दिवसांपासून दीपिकाची तब्येत ठीक नसल्याचे समोर आले. तिच्या यकृतामधील टेनिस बॉल इतका ट्यूमर असल्याची माहिती पती शोएब इब्राहिमने चाहत्यांना दिली होती. हा ट्युमर कर्करोगाचा आहे अशी माहिती अभिनेत्रीने पोस्ट शेअर करत दिली. अभिनेत्रीच्या तब्येतीबाबत मोठी माहिती समोर आल्याने तिच्या चाहत्यांमध्ये काळजीच वातावरण पसरलं आहे. दीपिकाने सोशल मीडियावर एक लांबसडक पोस्ट शेअर करत याबाबतची माहिती दिली आहे आणि चाहत्यांनी तिच्यासाठी प्रार्थना करण्याची विनंती केली आहे.
दीपिका कक्करच्या कर्करोगाची बातमी खरोखर धक्कादायक आहे. अभिनेत्रीची पोस्ट तिने पोस्ट करताच काही मिनिटांत व्हायरल झाली. चाहत्यांपासून सेलिब्रिटी चाहत्यांपर्यंत दीपिकाला धैर्य बाळगण्याचा सल्ला दिला आणि लवकरच तिला बरे करण्याची इच्छा व्यक्त केली. या बातमीने दीपिकाच्या कुटुंबासाठी खूप मोठा धक्का बसला आहे. राजीव अदतिया आणि आरती सिंग ते गौरव खन्ना आणि श्रद्धा आर्य पर्यंत अनेक सेलिब्रिटींना धक्का बसला असून ते दीपिकाला धैर्य देत आहेत.
दीपिकाने पोस्ट शेअर करत म्हटलं की, “तुम्हाला माहितीच आहे की, गेले काही आठवडे आमच्यासाठी खूपच कठीण गेले आहेत. माझ्या पोटात वरच्या भागात वेदना होत असल्याने मी रुग्णालयात दाखल झाले होते. यानंतर डॉक्टरांनी तपासणी करुन यकृतात (लिव्हर) टेनिस बॉलच्या आकाराचा ट्यूमर आहे असं सांगितलं होतं आणि आता हा ट्यूमर दुसऱ्या टप्प्यातील कर्करोगाचा (Stage 2 cancer) असल्याचं निदान झालं आहे. हा आमच्या आयुष्यातील सर्वात मोठा कठीण काळ असून यातून मी नक्की बाहेर येईन. माझे कुटुंबीय माझ्या पाठिशी आहेत. तुमच्या प्रार्थनाही माझ्याबरोबर कायम असतील असा विश्वास आहे”.
दीपिकाच्या तब्येतीबाबत कळताच तिचा नवरा शोएबही पूर्णतः कोसळला आहे. मात्र, दीपिकाच्या या कठीण क्षणात तो तिच्या पाठीशी खंबीरपणे उभा आहे आणि तिची काळजी घेत आहे. शोएबने दीपिकाला कॅन्सरचे निदान झाल्याचे कळताच एक व्हिडीओ शेअर करत म्हटलं आहे की, “अल्लाहच्या कृपेने, स्कॅन अहवाल स्पष्ट झाला आहे. व्हायरस किंवा त्याच्या पेशी शरीरात कोठेही पसरत नाहीत. जे काही आहे ते ट्यूमरपुरते मर्यादित आहे आणि एकदा ट्यूमर काढून टाकल्यानंतर, इंशाअल्लाह, गोष्टी अधिक चांगल्या होतील. आतापर्यंत, डॉक्टर असे म्हणत आहेत की सर्व काही नियंत्रणात आहे, तरी शेवटी अल्लाहला माहित आहे की भविष्यात काय घडणार आहे”.
