गेल्या अनेक वर्षांपासून अवघ्या महाराष्ट्राला खळखळून हसायला भाग पाडणारा लोकप्रिय शो म्हणजे ‘चला हवा येऊ द्या’. या शोसह शोमधील कलाकारांनी त्यांच्या अभिनयाने प्रेक्षकांच्या मनात स्थान निर्माण केलं आहे. शोमधील भाऊ कदम, कुशल बद्रिके, सागर कारंडे, भारत गणेशपुरे, श्रेया बुगडेसह अंकुर वाढवे आणि अनेक कलाकारांना एक वेगळीच ओळख निर्माण केली आहे. या शोमुळे अभिनेता कुशल बद्रिकेचे नशीब खऱ्या अर्थाने ऊजळलं असं म्हटलं तर अतिशयोक्ती होणार नाही.
‘चला हवा येऊ द्या’ या विनोदी रिअॅलिटी शोने त्याला एक वेगळी ओळख मिळवून दिली. अशातच आता कुशल लवकरच एका शोमध्ये ही पाहायला मिळणार आहे. कुशल एका लोकप्रिय हिंदी चॅनेलवरील विनोदी शोमध्ये झळकणार असून या शोचा एक प्रोमो नुकताच सोशल मीडियावर शेअर करण्यात आला आहे. या प्रोमोमध्ये अनेक हिंदी कलाकारांसह मराठमोळा कुशल बद्रिकेही पाहायला मिळत आहे.
कुशल लवकरच सोनी टीव्हीवरील ‘मॅडनेस मचायेंगे’ या शोमध्ये महत्त्वाच्या भूमिकेत दिसणार आहे. या शोमध्ये कुशलसह अंकिता श्रीवास्तव, गौरव दुबे, केतन सिंग, पारितोष त्रिपाठी, स्नेहिल मेहरा व इंदर सहानी आदी कलाकारही पाहायला मिळत आहे. ‘मॅडनेस मचायेंगे’ हा शो सोनी टीव्हीवरील ‘द कपिल शर्मा शो’ची जागा घेणार असल्याचे म्हटले जात आहे.
दरम्यान, मराठी कलाविश्व गाजवल्यानंतर कुशल आता हिंदी प्रेक्षकांचेही मनोरंजन करायला सज्ज झाला आहे. त्यामुळे तो आता या हिंदी शोमधून काय कमाल करणार याकडे त्याच्या चाहत्यांचे लक्ष लागून राहिले आहे. तसेच अनेकजण त्याच्या या नवीन शोसाठी खूपच उत्सुक आहेत.
