देशातील सर्वात श्रीमंत उद्योगपती मुकेश अंबानी व निता अंबानी यांचा धाकटा मुलगा अनंत अंबानी व राधिका मर्चंट यांच्या लग्नाआधीच्या कार्यक्रमांची जय्यत तयारी सुरु झाली आहे. हा कार्यक्रम १ मार्च ते ३ मार्च दरम्यान गुजरात येथील जामनगर येथे पार पडणार आहे. या कार्यक्रमाला उपस्थित राहणाऱ्या पाहुण्यांसाठी सुमारे २२०पेक्षा अधिक पंचपक्वान्न ठेवण्यात येणार आहे. राधिका व अनंत यांचा कार्यक्रम गुजरातमधील जामनगर येथे पार पडणार असून बॉलिवूड तसेच सर्वच क्षेत्रातील अनेक दिग्गज मंडळी या सोहळ्याला उपस्थित राहणार आहेत. (Anant Ambani and Radhika Marchant pre-wedding function)
राधिका व अनंत यांचा लग्न सोहळा हा भारतातील आतापर्यंतचा श्रीमंत सोहळा ठरु शकतो. अनंत व राधिका हे दोघेही १२ जुलै २०२४ रोजी लगनबंधनात अडकणार असल्याचं समोर आलं आहे. अंबानी कुटुंबाने लग्नाआधीचे कार्यक्रम पार पाडण्यासाठी जामनगर येथे रिलायन्स ग्रीन कॉम्प्लेक्स येथे मोठा सोहळा आयोजित केला आहे. या कार्यक्रमासाठी बॉलिवूडसहित हॉलिवूडमधीलही अनेक मोठ्या व्यक्तींचा सहभाग पाहायला मिळणार आहे.
बॉलिवूडमधील अमिताभ बच्चन, शाहरुख खान, आमीर खान, रणबीर कपूर, आलिया भट्ट, रणवीर सिंह, दीपिका पदूकोण, सलमान खान, जान्हवी कपूर, करण जोहर यांची उपस्थिती या लग्नापूर्वीच्या कार्यक्रमांना असणार आहे. तसेच क्रीडा विश्वातून मास्टर ब्लास्टर सचिन तेंडुलकर, महेंद्रसिंह धोनी, अभिनव बिंद्रा ही मंडळी सहभागी राहणार असल्याची शक्यता वर्तविण्यात आली आहे. तसेच उद्योग विश्वातील टाटा सन्सचे एन चंद्रशेखरन्, आदित्य बिर्ला समूहाचे के. एम. बिर्ला, अदानी समूहाचे गौतम अदानी व भारती एअरटेलचे सुनील भारती यांची उपस्थिती असू शकते, अशी प्राथमिक माहिती आहे.
अनंत व राधिकाच्या लग्नाआधीच्या कार्यक्रमाचे स्वरुप समोर आले आहे. पहिल्या दिवशी म्हणजे १ मार्चला ‘ॲन इव्हिनिंग इन एव्हरलँड’ थीम आहे. या दिवशी ‘एलिगंट कॉकटेल’ असा ड्रेस कोड असून यामध्ये संगीत, नृत्य व काही खास परफॉर्मन्सचा समावेश असणार आहे. तसेच दुसऱ्या दिवशी ‘अ वॉक ऑन द वाइल्डसाइड’ ही थीम असणार असून या दिवशीचा ड्रेस कोड ‘जंगल फिव्हर’ आहे आणि तिसऱ्या दिवशी ‘हस्ताक्षर’ अशी थीम असून यामध्ये आलेल्या पाहुण्यांचे संगीत व नृत्याने मनोरंजन करण्यात येणार आहे. याच दिवशी सायंकाळी ६ वाजता राधा कृष्ण मंदिरात हस्ताक्षर सोहळा साजरा केला जाणार आहे. या दिवशीचा ड्रेस कोड ‘हेरिटेज इंडियन’ असणार आहे.
