Fatima Sana Shaikh harassment : मराठी-हिंदी सिनेविश्वातील अनेक अभिनेत्रींनी आजवर त्यांच्याबरोबर घडलेल्या वाईट प्रसंगाबाबत स्पष्टपणे भाष्य केलं आहे. केवळ अभिनेत्रीच नाहीतर सर्वसामान्य स्त्रियांनाही वाईट स्पर्श, वाईट वागणूक याचा अनुभव आला आहे. पण अभिनेत्रींकडे बरेचदा प्लॅटफॉम उपलब्ध असल्याने त्या या गोष्टी सहजपणे सांगतात. काही अभिनेत्री असं काही सांगायला घाबरतात तर काही स्पष्टपणे मुद्दा मांडून इतरांना सावध करतात. अशातच आता एका बॉलिवूड अभिनेत्रीने तिच्याबरोबर घडलेल्या वाईट प्रसंगाबाबत खुलासा केला आहे. अभिनेत्री फातिमा सना शेख हिने तिच्याबरोबर घडलेल्या एका अतिशय भयानक घटनेचा खुलासा केला. सार्वजनिक ठिकाणी अयोग्यरित्या स्पर्श केल्याने तिचा संताप झाला.
‘हॉटरफ्लाय’ला दिलेल्या मुलाखतीत फातिमाने तिच्याबरोबर घडलेल्या वाईट प्रसंगाचा उल्लेख केला. एका व्यक्तीने तिला सार्वजनिक ठिकाणी अयोग्यरित्या स्पर्श केला, त्यानंतर अभिनेत्रीने त्याला मारहाण केली, पण त्या व्यक्तीनेही फातिमाला खूप मारहाण केली. नेमकं काय घडलं याबाबत तिने नुकत्याच दिलेल्या मुलाखतीत भाष्य केलं आहे. फातिमा म्हणाली, “एकदा एका माणसाने मला अयोग्यरित्या स्पर्श केला, म्हणून मी त्याला मारलं. पण नंतर त्याने मला इतकं जोरात मारलं की मी जमिनीवर पडले”.
फातिमा पुढे म्हणाली, “मी त्याला फक्त अयोग्यरित्या स्पर्श केल्यामुळे मारलं, पण तो इतका रागावला की, त्याने मला इतकं जोरात मारलं की, मी थेट खाली पडले. त्या घटनेनंतर मी थोडी सावध झाले. मला समजलं की, अशा परिस्थितीत कशी प्रतिक्रिया द्यायची याचा विचार आपणही केला पाहिजे. तुम्हाला वाटतं, आपल्याबरोबर काहीतरी चूक होत आहे आणि आपण त्यावर कशी प्रतिक्रिया द्यायची याचा विचार केला पाहिजे”.
आणखी एक किस्सा सांगत ती म्हणाली, “लॉकडाऊनच्या काळातही ‘लॉकडाऊन दरम्यान मी मुंबईत मास्क घालून सायकल चालवत होते. तेव्हा एक टेम्पो ड्रायव्हर सतत हॉर्न वाजवत होता आणि विचित्र आवाज काढत होता. मी माझ्या रस्त्यावर येईपर्यंत तो माझा पाठलाग करत होता”. फातिमा सना शेख अलीकडेच अनुराग बसू दिग्दर्शित ‘मेट्रो इन दिनो’ चित्रपटात दिसली होती. अली फजल, पंकज त्रिपाठी, कोंकणा सेन शर्मा, नीना गुप्ता, अनुपम खेर आणि आदित्य रॉय कपूर सारखे कलाकार या सिनेमात महत्त्वाच्या भूमिकांमध्ये आहेत.
