बॉलिवूडचा खिलाडी अर्थात अक्षय कुमार, शाहरुख खान आणि अजय देवगण हे तीनही बॉलिवूडचे कलाकार एकत्र चर्चेत आले आहेत. बरं पण हे कोणत्या चित्रपटामुळे चर्चेत आले नसून त्यांचं चर्चेत येण्याचं कारण काही वेगळंच आहे. बॉलिवूडच्या या तीन अभिनेत्यांना केंद्र सरकारने नोटीस पाठवली असल्याचं समोर आलं आहे. आरोग्यासाठी घातक असलेल्या पान मसाल्याचा जाहिरात केल्याप्रकरणी त्यांना नोटीस पाठवण्यात आली आहे. (ShahRukh Khan Akshay Kumar Ajay Devgn HC Notice)
आरोग्यासाठी घातक असलेल्या गुटखा व पान मसाल्याच्या जाहिरात केल्याप्रकरणी बॉलीवूड अभिनेते अक्षय कुमार, शाहरुख खान आणि अजय देवगण यांना केंद्र सरकारने नोटीस बजावल्या आहेत. अलाहाबाद उच्च न्यायालयाच्या लखनऊ खंडपीठाच्या अवमानना याचिकेवरील सुनावणीदरम्यान केंद्र सरकारच्या वकिलांनी अभिनेत्यांना नोटीस पाठवली असल्याचं समोर आलं आहे.
दरम्यान या प्रकरणावर सुप्रीम कोर्टातही सुनावणी सुरू आहे. त्यामुळे अलाहाबाद हायकोर्टाच्या लखनऊ खंडपीठासमोर केलेली अवमानना याचिका फेटाळण्यात यावी, अशी मागणी केंद्र सरकारच्या वकिलांनी केली आहे. युक्तिवाद ऐकल्यानंतर खंडपीठाने सुनावणीची तारीख निश्चित केली आहे. ९ मे २०२४ रोजी ही सुनावणी करण्यात येणार आहे. २२ ऑक्टोबरला सरकारला निवेदन देण्यात आले होते. पण पुढे यावर काहीही कारवाई झाली नसल्याचा युक्तिवाद याचिकाकर्त्याने केला.
शुक्रवारी डेप्युटी सॉलिसिटर जनरल एसबी पांडे यांनी उच्च न्यायालयात यावरून भाष्य केले. ते म्हणाले. “केंद्राने अक्षय कुमार, शाहरुख खान आणि अजय देवगण यांना कारणे दाखवा नोटीस बजावली आहे. अमिताभ बच्चन यांनी यापूर्वीच आपला करार रद्द केला असूनही त्याची जाहिरात दाखवणाऱ्या गुटखा कंपनीला कायदेशीर नोटीस पाठवली होती, असेही न्यायालयाला सांगण्यात आले” असं त्यांनी म्हटलं.
