Suraj Chavan Bigg Boss Marathi Season 5 Grand Finale Winner : ‘बिग बॉस मराठी’च्या पाचव्या सीझनचा महाअंतिम सोहळा नुकताच पार पडला. यंदाच्या पर्वात सूरज चव्हाण बाजी मारणार हे जवळपास निश्चित झालं होतं. गेल्या काही दिवसांपासून सगळे मराठी प्रेक्षक ज्या क्षणाची आतुरतेने वाट बघत आहेत, तो क्षण अखेर पार पडला आहे आणि सूरज चव्हाणने ‘बिग बॉस मराठी ५’च्या विजेतेपदावर आपलं नाव कोरलं. शोचा होस्ट रितेश देशमुखने ‘बिग बॉस मराठी ५’च्या विजेतेपदाची घोषणा करत सूरज चव्हाणचे नाव जाहीर केलं आहे. सूरजला ‘बिग बॉस’च्या ट्रॉफीसह रोख रक्कम १४ लाख ६० हजार आणि ईलेक्ट्रिक बाइकही मिळाली आहे. (Bigg Boss Marathi 5 Suraj Chavan Friends Celebration)
सूरज चव्हाण विजयी होताच सोशल मीडियासह सर्वच माध्यमांमध्ये संमिश्र प्रतिक्रिया व्यक्त होताना दिसत आहेत. काही जण सूरज हा सहानूभुतीमुळे जिंकला असल्याचं म्हटलं जात आहे. तर काही जण मात्र त्याच्या विजयावर खुश आहेस. सूरज चव्हाण विजयी होताच अनेक कला व राजकीय क्षेत्रातील अनेकांनी त्याच्या विजयावर आनंद व्यक्त केला आहे. तसंच सूरजच्या गावीदेखील मोठ्या जल्लोषात त्याच्या विजयाचा आनंद साजरा केला गेला आहे.
सूरज चव्हाणच्या इन्स्टाग्राम स्टोरीवर एक व्हिडीओ शेअर करण्यात आला आहे, ज्यात सूरजच्या मोढवे गावकऱ्यांनी गुलाल उधळत आणि डीजे लावून डान्स केला आहे. ‘बिग बॉस मराठी’चा विजेता हा सूरजचं व्हावा अशी इच्छा त्याचे अनेक चाहते करत होते आणि त्याच्या या चाहत्यांची ही इच्छा सूरजने पूर्ण केली आहे. त्यामुळे सूरजच्या समस्त चाहते मंडळी व गावकऱ्यांनी त्याच्या विजयाचा मोठा जल्लोष साजरा केला आहे.
दरम्यान, ‘बिग बॉस मराठी’चा महाविजेता सूरज चव्हाण ठरला असून या शोच्या उपविजेतेपदाचा बहुमान गायक अभिजीत सावंतला मिळाला आहे. सूरजने ‘बिग बॉस’च्या घरात एन्ट्री केल्यानंतर अनेकांनी नाकं मुरडली होती. या शोमध्ये त्याला का घेतलं गेलं? अशा अनेक प्रतिक्रिया आल्या होत्या. मात्र या शोचे विजेतेपद पटकावत अनेक नकारात्मक प्रतिक्रिया करणाऱ्यांना सूरजने सणसणीत उत्तर दिले आहे.
