Bigg Boss Marathi 5 Update : ‘बिग बॉस मराठी’चा नवा सीझन प्रेक्षकांच्या भेटीला आला आहे. यंदाच्या या सीझनमध्ये गोलीगत सूरज चव्हाण पुन्हा एकदा चर्चेत आला आहे. गोलीगत सूरजला ‘बिग बॉस मराठी’चा खेळ कळलाच नाही, असंही अनेकजण म्हणू लागले. पण त्याने स्वत:वर मेहनत घेतली आणि आपला खेळ दाखवायला सुरुवात केली. ‘बिग बॉस’ यांनी स्वतः सूरजला पाठिंबा दिलेला पाहायला मिळाला. वीकेंडला भाऊच्या धक्क्यावर रितेश भाऊनेदेखील सूरजच्या खेळाचं कौतुक केलं. तसेच त्याला यापुढेही गोलीगत पॅटर्नने खेळण्यासाठी प्रोत्साहन दिलं.
‘बिग बॉस मराठी’च्या नव्या प्रोमोमध्ये गोलीगत सूरज चव्हाण गार्डन एरियामध्ये केर काढताना दिसत आहे. त्यावर ‘कोकण हार्टेड गर्ल’ अंकिता प्रभू वालावलकर आणि हास्यसम्राट पंढरीनाथ कांबळे चर्चा करताना दिसत आहेत. अंकिता म्हणते, “सूरजला असं बघून मला कसंतरी वाटतं”. त्यावर पॅडी म्हणतो,”बिचारा बाहेरदेखील हेच काम करत असेल. तो काल मला म्हणालेला, दादा मला खूप वाईट वाटतं मी वर झोपतो आणि तुम्ही खाली झोपता”. त्यावर अंकिता म्हणते,”सूरजला गेम कळला नाही, पण माणसं कळली”.
टिक टॉकच्या राज्यात लोकप्रियतेस आलेला गोलीगत सूरज चव्हाणचं नेटकऱ्यांकडून चांगलच कौतुक होत आहे. अस्सल मराठी मातीतला स्टार सूरज चव्हाण आता बिग बॉस मराठीचं घरदेखील गाजवत आहे. सूरजच्या समोर आलेल्या या प्रोमोवर कलाकारांसह, नेटकऱ्यांनीही कमेंट करत त्याला भरभरुन पाठिंबा दिला आहे. सूरजच्या या नव्या प्रोमोवर, “बिना आई बापाचं पोर आहे ते जनतेने आईबाप बनून आशीर्वाद द्यावे आणि सूरज चव्हाणला वोट करावे”, “ज्याच्यामुळे शोचा TRP वाढला असा एकमेव स्पर्धक म्हणजे सूरज”, “सूरजला खोटं वागता येत नाही म्हणून तो आज लाखो लोकांच्या हृदयावर अधिराज्य करत आहे”, असं म्हटलं आहे.
तर याशिवाय काहींनी, “गावकडच्या मातीतला माणूसकी जपणारा माणूस”, “गेम कळो न कळो पण आमच्या सूरज भाऊमुळे घरातल्या सर्व सदस्यांना माणसातील माणुसकी हे नक्कीच कळले असेल”, “हा व्हिडीओ पाहून अक्षरश अंगावर काटा आला. सूरजमध्ये खूप माणुसकी आहे. सूरज तू पूर्ण महाराष्ट्राचे मन जिंकलं आहेस. तुझ्यामुळे जे ‘बिग बॉस’ पाहत नव्हते ते हा कार्यक्रम पाहायला लागले”, “माणसं कळली आणि संपूर्ण महाराष्ट्रातील माणसं कमावली”, अशा कमेंट करत त्याला पाठिंबा दर्शविला आहे.
