Bigg Boss Marathi 5 : ‘बिग बॉस मराठी’च्या पाचव्या पर्वात काही सदस्यांना उकडलेलं अन्न खाण्याची शिक्षा देण्यात आली होती. ही शिक्षा देण्यामागचे कारण देत ‘बिग बॉस’ने असं म्हटलं होतं की, “आज महाराष्ट्रात एक वेळच्या अन्नासाठीदेखील चूल पेटणं शक्य होतं नाही. या परिस्थितीची झलक मिळावी म्हणून आपण केवळ उकडलेलं अन्न खा”. ‘बिग बॉस’चे हे बोलणे ऐकून घरातील सर्वच सदस्य भावुक झाले होते. मात्र यावेळी पंढरीनाथ कांबळे यांना आपले अश्रू अनावर झाले. मात्र पॅडी यांना अश्रू कं अनावर झाले याबद्दल त्यांची मैत्रीण व सहकलाकार अभिनेत्री विशाखा सुभेदारने नुकतीच पोस्ट शेअर केली आहे. “आपला पॅडी का रडला?” असं म्हणत विशाखा यांनी पंढरीनाथ यांचा एक किस्सा सांगितला आहे. (Vishakha Subhedar Shared Memory)
विशाखा यांनी इन्स्टाग्राम अकाऊंटद्वारे पॅडी यांचा रडतानाचा एक व्हिडीओ शेअर केला आहे आणि असं म्हटलं आहे की, “आपला पॅडी का रडला? खरं सांगू का… यातला हा माणूस त्याच्या जवळच्या अनेक मित्र-मंडळींनी पाहिलाय. अत्यंत प्रामाणिक आणि भावनाप्रधान, मदत करणारा, दयाशील असा आमचा पॅडी. एक किस्सा आठवला, असंच आम्ही प्रयोगाला जात होतो. रस्ता चुकला म्हणून बस थांब्यावर असलेल्या एका बाईला रस्ता विचारला, तर तिने रस्ता सांगताना अरे तुम्ही तर माझ्याच घरावरुन जाणार, माझ्या घरावरुन पुढे गेलात ना की, मग डावीकडे वळलं की मग पुढे थोडं उजवीकडे वळले की तुमचा ठिकाणी. असं म्हणाली. त्यावर पॅडी म्हणाला की अहो काकी तुमचं घर आम्हाला कुठे माहिती आहे. हसलो. त्यावर तिने हसून पुन्हा एकदा रस्ता सांगितला आणि आम्ही थोडं पुढे गेलो”.
यापुढे विशाखा यांनी असं म्हटलं की, “पुढे गेल्यावर त्यांनी मध्येच गाडी थांबवायला सांगितली. मला म्हणाला अगं आपण त्या बाईच्या घरावरनं जाणार मग आपण तिला का घेतलं गाडीत? आम्ही मागे गेलो आणि त्या बाईला त्यांनी गाडीत बसवलं. संपूर्ण प्रवासात आमच्या गप्पा चालल्या होत्या. तिचा नवरा त्यांची मासेमारीची बोट, त्यावरचे कामगार सगळं. तिने काही आम्हा दोघांना ओळखलं नव्हतं. तिचं आपल दर काही वाक्यानंतर चालू होतं ‘बाई पहिल्यांदा एवढ्या मोठ्या गाडीत बसले… कधीच नाही बसले गं गाडीत.. नुसत्या गाड्या तोंडासमोरुन गाड्या जायच्या,बसले कधीच नव्हते आज पहिल्यांदा बसले.. ते पण एवढ्या मोठ्या गाडीत…’. मग तिला तिच्या घराजवळ उतरवलं”.
आणखी वाचा – Video : अन् ‘बिग बॉस मराठी’च्या घरातले सगळेच सदस्य रडू लागले, पण नेमकं झालं काय? पाहा हा भावुक प्रोमो
पुढे विशाखा यांनी पॅडीबद्दल असं म्हटलं की, “तिचा आनंद पाहून पॅडीला आनंद होत होता. आपल्या आईला सोडल असं त्याला वाटत होतं. त्यानंतर पुढच्या प्रवासात आम्ही दोघही अबोल. त्याने त्याच्या आईला आणि मी माझ्या बापाला कवटाळून प्रवास केला. असा आहे पॅडी! दुसऱ्याच्या सुखदुःखात साथ देणारा, त्याची शिकवण्याची पद्धत अशीच आहे. त्याचे टोमणे बोल अमृताची फळ वाटतात कारण तो फार कमी वेळा तसं बोलतो आणि गरज पडली तरच. सुरज पहिल्या दिवसापासून बेडवर पॅडीच्या बाजूला झोपला. त्यावेळी तर त्यांची ओळखही नव्हती.. हा आलाय? पासून आता त्याची काळजी घेणे त्यात फक्त माया आहे. त्याच्या वागण्या-बोलण्यात कुठला स्वार्थ असता तर तो आज कुठल्याकुठे असता”.
