Bigg Boss Marathi 5 fame Suraj Chavan : ‘बिग बॉस’च्या पाचव्या सीझनमध्ये पहिल्या दिवसापासून चर्चेत असलेलं एक नाव म्हणजे सूरज चव्हाण. टीकटॉक स्टार सूरज चव्हाण बिग बॉसच्या घरात येताच, अनेकांनी टीका केली. पण जेव्हा को घरात आला, तेव्हा त्याला बोलणंही येत नव्हतं. पण आता हळहळू त्याला गेम कळायला लागला असून तो प्रत्येक खेळात सहभागी होत आहे. पहिल्या दिवशी टीका करणाऱ्यांनाही आता सूरजला पाठिंबा दिला आहे. आधी ट्रोल केलं, पण त्याच लोकांनी सूरजसाठी सोशल मीडियावर पोस्ट शेअर केल्याचं दिसून येत आहे.त्याला प्रेक्षकांचं प्रचंड प्रेम मिळताना दिसत आहे. अशातच आता सूरज मोठ्या पडद्यावरदेखील झळकण्यास सज्ज होणार आहे. (Bigg Boss Marathi 5 Fame Suraj Chavan Movie)
छोट्याशा खेडेगावातून आलेल्या सूरजने झगमगाटीच्या दुनियेत स्वतःचं असं स्थान स्वतः मिळवलं. सध्या ‘बिग बॉस मराठी’ मुळे सूरज भलतात चर्चेत आलेला पाहायला मिळत आहे. अशातच आता सूरज त्याच्या आगामी ‘राजाराणी’ या चित्रपटातून मोठा पडदा गाजवणार आहे. काही दिवसांपूर्वीच ‘राजाराणी’ या चित्रपटाच्या पोस्टरने साऱ्यांचीच मन जिंकली. सूरज आता सत्य घटनेवर आधारित उलगडणार्‍या या प्रेम कथेतून महत्वपूर्ण भूमिका साकारत प्रेक्षकांच्या भेटीस येणार आहे. या चित्रपटात मुख्य कलाकाराच्या दोस्ताच्या भूमिकेत सूरज असणार आहे. चित्रपटात प्रमुख भूमिकेत रोहन पाटील व वैष्णवी शिंदे ही कलाकार मंडळी दिसणार आहेत. तर चित्रपटातील रोहनच्या मित्राच्या महत्त्वपूर्ण भूमिकेत सूरज दिसणार आहे.
या चित्रपटात भारत गणेशपुरे, सुरेश विश्वकर्मा, माधवी जुवेकर, भक्ती चव्हाण, शिवाजी दोलताडे, तानाजी गलगुंडे या कलाकारांनी महत्त्वपूर्ण भूमिका साकारल्या आहेत. त्यामुळे आता बिग बॉसमध्ये हवा करणारा सूरज त्याच्या आगामी ‘राजा राणी’ चित्रपटात काय जादू करणार?. त्याची भूमिका नेमकी कशी असणार? बिग बॉस प्रमाणेच तो त्याच्या या चित्रपटातील भूमिकेतूनही प्रेक्षकांचे मन जिंकणार का? हे येत्या काळात प्रेक्षकांसमोर येईलच. त्यामुळे लवकरच सूरजला मोठ्या पडद्यावर एका महत्त्वपूर्ण भूमिकेत पाहणं फारच रंजक ठरणार आहे.
दरम्यान, ‘राजाराणी’ या चित्रपटाची कथा, पटकथा, संवाद, गीतलेखन व निर्मिती गोवर्धन दोलताडे यांनी केली आहे. तर चित्रपटाच्या दिग्दर्शनाची जबाबदारी शिवाजी दोलताडे यांनी सांभाळली आहे. तसंच संगीत दिग्दर्शन पी. शंकरम व पार्श्वसंगीत विजय नारायण गवंडे यांनी केलं आहे. सूरजचा ‘राजाराणी’ हा चित्रपट येतया १८ ऑक्टोबर २०२४ पासून जवळच्या चित्रपटगृहांमध्ये प्रदर्शित होणार आहे.
