‘बिग बॉस मराठी’च्या पाचव्या पर्वामुळे सूरज चव्हाण महाराष्ट्राच्या घराघरांत लोकप्रिय झाला. सूरज चव्हाणला ‘बिग बॉस’च्या घरात सर्वांनीच पहिल्या दिवसापासून सांभाळून घेतलं. शिक्षण कमी असल्याने सुरुवातीला सूरजला टास्क समजून घेण्यात अडचणी निर्माण व्हायच्या. पण, पंढरीनाथ व अंकिताने त्याला या काळात खंबीरपणे साथ दिली. अंकिता व पॅडी यांनी सूरजला गेम व टास्कपलीकडे जाऊन त्याच्या खऱ्या आयुष्याबद्दलच्याही अनेक गोष्टी सांगितल्या आणि शिकवल्याही. यादरम्यान सूरजला नॉमिनेट केल्यामुळे अंकिता बऱ्याचदा ट्रोलही झाली. तसंच अंकिताने सूरजला घर बांधून देणार असल्याचे म्हटलं होतं आणि हा मुद्दाही चांगलाच गाजला होता. ‘बिग बॉस मराठी’मधून बाहेर येताच अंकिता सूरजला घर बांधून देणार का? याबद्दल सोशल मीडियावर अनेक चर्चा झाल्या होत्या. (Ankita Walawalkar on Suraj Chavan House)
त्यावर आता अंकिताने भाष्य केलं आहे. अंकिताने तिच्या युट्यूब चॅनेलद्वारे सूरज चव्हाणला घर बांधून देणार असल्याच्या चर्चांवर भाष्य केलं आहे. याबद्दल अंकिता असं म्हणाली की, “सूरजच्या घराबद्दल सांगायचे झाले तर, सगळेजण मला म्हणत आहेत की, ताई तू या विषयावर बोललं पाहिजे. सूरजचं घर होणे किती महत्त्वाचे आहे हे आम्हाला पहिल्या आठवड्यापासून माहीत होतं. तेव्हा मी त्याला असं म्हणाले होते की, आपण ‘बिग बॉस’मधून बाहेर गेल्यावर तुझं घर बांधून घेण्याची जबाबदारी माझी असेल. मी आणि माझी सोशल मीडियाची टीम मिळून तुझं हे घर बांधून देऊ. तेव्हा आम्हाला हे माहीत नव्हतं की, सूरजसाठी बाहेर किती लोक वेडे झाले आहेत. लोकांना तो किती आवडतो आणि लोक त्याच्यासाठी काहीही करु शकतात याची पुसटशीही कल्पना नव्हती”.
आणखी वाचा – “हवं तर टोल घ्या पण…”, सुप्रसिद्ध मराठी अभिनेत्रीची ट्रॅफिकला वैतागून पोस्ट, म्हणाली, “सकाळी सात वाजता…”
यापुढे ती असं म्हणाली की, “बिग बॉसमधून बाहेर आल्यानंतर मला असं कळलं की, या गोष्टीचा खूप बाऊ केला गेला. सारखं घर घर घर केलं गेलं. पण एका अर्थाने हे चांगलं झालं. कारण त्यामुळे अजित पवारांकडून घोषणा झाली की, त्याला 2BHK फ्लॅट देण्यात येणार आहे. यासाठी मी त्याच्या गावातील एका सुजाण व्यक्तीच्या संपर्कात आहे. तर आमच्या नात्याबद्दल बाऊ करण्याची काहीही गरज नाही. “आता ताई तू सूरजला घर बांधून देणार का?” असं मला विचारलं जात आहे. तर माझं म्हणणं आहे की, त्याला नक्की किती घरं हवी आहेत. त्याला ज्या घराचे वचन दिलं गेलं आहे, ते घर त्याला मिळावं यासाठी मी नक्की प्रयत्न करणार आहे. मी ते त्याला घर मिळवून देणार आहे. मला असं वाटतं की, सूरज हा असा व्यक्ती आहे ज्याला 2BHK वगैरे घराची गरज नाही. त्याच्यासाठी फक्त त्याच्या गावात घर असणं हेच महत्त्वाचं आहे”.
यापुढे अंकिताने असं म्हटलं आहे की, “बिग बॉसच्या घरातून बाहेर आल्यावर अशी वेळ आली होती की, त्याला एका दिवसात ३-४ घर मिळाली असती. लोक त्याला द्यायला तयार होते. ‘बिग बॉस’च्या घरात एक टास्क झाला होता, ज्यात मी माझ्या एका मित्राला त्याच्या घराविषयी बोलले होते. पण तेव्हा ते दाखवलं गेलं नाही. तेव्हा घरातील सर्वांना कळलं की, अंकिता सूरजला घर बांधून देणार आहे आणि त्याचा बाऊ बनवला गेला. त्यामुळे मी त्याला घर बांधून देण्याचा विषय सारखा बोलला गेला आणि मी सहानूभूती घेत आहे असं म्हटलं गेलं. त्याला अजित पवारांनी घोषणा केलेले घर मिळाले पाहिजे यासाठी मी प्रयत्न करेन. यासाठी मी कायमच त्याच्या संपर्कात राहणार आहे. अर्थात त्याने मला यासाठी संपर्क केला पाहिजे”.
