‘बिग बॉस मराठी सिझन ४’चा विजेता ठरलेला अक्षय केळकर सध्या ‘ढोलकीच्या तालावर’ या लोकप्रिय रिऍलिटी शोचे सूत्रसंचालन करत आहे. काही दिवसांपूर्वी त्याच्या दोन कटिंग या शॉर्ट फिल्मने प्रेक्षकांच्या मनावर राज्य केलं. या शॉर्ट फिल्म मधील समृद्धी केळकर आणि अक्षयच्या जोडीला प्रेक्षकांनी भरपूर प्रेम दिलं. सध्या अक्षय ढोलकीच्या तालावर या रिऍलिटी शोच्या सूत्रसंचालन करण्यात रमला आहे. अशातच अक्षयच्या सोशल मीडियावरील एका पोस्टने साऱ्यांच्या नजरा वाळवून घेतल्या आहेत. (Akshay kelkar on Surekha Punekar)
‘ढोलकीच्या तालावर’ या मंचावर घुंगराच्या तालावर सगळ्यांना नाचविणाऱ्या आणि आपल्या मोहक सौंदर्याने भुरळ घालणाऱ्या नृत्यांगना सुरेखा पुणेकर यांनी हजेरी लावली होती. सुरेखा पुणेकर यांच्या लावणीचे लाखो चाहते आहेत. अशातच ‘बिग बॉस’ फेम अक्षय केळकरने सुरेखा ताईंच्या लावणीबद्दल एक पोस्ट शेअर केली आहे.
पाहा अक्षय काय म्हणाला सुरेखा पुणेकर यांच्याबद्दल (Akshay kelkar on Surekha Punekar)
या पोस्टमध्ये अक्षयने सोशल मीडियावर एक व्हिडीओ देखील शेअर केला आहे. या व्हिडिओमध्ये अक्षय सुरेखा ताईंचं भरभरून कौतुक करताना दिसतोय. तसेच यावेळी त्याने ‘मी फक्त तुमचाच आहे’, असेही म्हटलं आहे. अक्षयने पोस्ट शेअर करत लिहिलंय, “आयुष्यात कधीच live लावणीचा कार्यक्रम पाहिला नव्हता. ‘ढोलकीच्या तालावर’च्या निमित्ताने आमच्या सर्व contestants ना एकमेकांशी चढाओढ करताना पाहतो, पण ते नाचत असताना त्यांनाही आपण स्पर्धेत आहोत याची जाणीव असतेच.”
“काल पहिल्यांदाच खऱ्या अर्थाने एका लवण्यावतीला बेभान होऊन नाचताना पाहिलं. या लावण्यावतीला दाद देण्यासाठी समोर प्रेक्षक म्हणून जवळ जवळ ३००० महिला होत्या. त्या कलेचा खऱ्या अर्थाने सन्मान झाला आणि त्या क्षणाचा मी साक्षीदार होऊ शकलो याचा मला खूप अभिमान आहे. आज पर्यंत तुमच्या विषयी खूप ऐकून होतो पण सुरेखा यांना live नाचताना विंगेतून पाहिलं आणि खरंच माझ्यासाठी पर्वणी होती.”
अक्षय केळकरने सोशल मीडियावर केलेली ही पोस्ट विशेष चर्चेत आहे. सुरेखा ताईंनीही अक्षयला प्रेम दिलेलं पाहायला मिळतंय.