Bigg Boss 17 Latest News : ‘बिग बॉस १७’ मध्ये सध्या बरेच ट्विस्ट आलेले पाहायला मिळत आहेत. अंकिता लोखंडेच्या निर्णयामुळे बेदखल झालेल्या अभिषेक कुमारची पुन्हा एकदा सलमान खानने ‘बिग बॉस’च्या घरात एन्ट्री केल्याचे पाहायला मिळाले. दरम्यान नुकत्याच झालेल्या ‘विकेंड का वार’मध्ये सलमान खानने अंकिता, मुनव्वर व समर्थ जुरेल यांची चांगलीच कानउघडणी केली. आता, ‘बिग बॉस १७’ चा नवा प्रोमो समोर आला आहे.
‘बिग बॉस’च्या नव्या प्रोमोमध्ये असं समोर आलं आहे की, नवीन टास्क दरम्यान अंकिता विकी जैनला खडेबोल सुनावते. ती त्याला निरुपयोगी म्हणते आणि मुनव्वरला सपोर्ट करत विकीला म्हणते, “विकी निरुपयोगी गोष्टींमध्ये विनाकारण घुसतो आणि मध्ये मध्ये करत असतो”. यानंतर अंकिताने पतीबद्दलचा राग टास्कदरम्यान व्यक्त केलेला पाहायला मिळाला.
यानंतर ‘बिग बॉस १७’च्या घरात फॅमिली वीक येणार असल्याचं दाखवण्यात आलं आहे. यावेळी ‘बिग बॉसच्या घरातील सदस्यांना त्यांच्या कुटुंबातील सदस्यांकडून एका व्हिडिओद्वारे संदेश दाखवण्यात आला होता. ज्यामध्ये अंकिता लोखंडेची आई, मन्नाराची बहीण, अभिषेकची आई, विकी जैनची आई आणि ईशा मालवीयचे वडील पडद्यावर पाहायला मिळाले. दरम्यान आई-वडिलांना पाहून सगळेच स्पर्धक भावूक झाले.
अंकिता व विकी जैन यांची आई पुन्हा एकदा ‘बिग बॉस १७’ मध्ये प्रवेश करणार आहे. तसेच, जेव्हा विकी जैनची आई पडद्यावर आली तेव्हा तिने सांगितले की, “विकी व मी कधीच वेगळे झालो नाही, त्याला पाहून मला खूप आनंद होईल, मी त्याला घट्ट मिठी मारेन, मी त्याला सोडणार नाही”असं तिने लेकाबद्दल सांगितलं. तर इकडे अंकिताची आई सुद्धा व्हिडीओद्वारे संदेश देत म्हणाली, “मी तिला कधी भेटणार याचा प्रत्येक क्षण मोजत आहे” असं म्हणत ती भावुक झाली.
