मराठी चित्रपटसृष्टीला सोन्याचे दिवस आणणारा चित्रपट म्हणून सर्वात जास्त नावाजला गेलेला चित्रपट म्हणजे ‘बाईपण भारी देवा’. स्त्रियांच्या आयुष्यातील चढउतार यावर भाष्य करणाऱ्या या चित्रपटाला प्रेक्षकांनी भरभरून प्रेम दिलं आणि बॉक्स ऑफिसवर या चित्रपटाने धुमाकूळ घातला. ‘बाईपण भारी देवा’ या चित्रपटाच्या यशानंतर या चित्रपटाच्या दिग्दर्शक, निर्मात्यांनी ‘आईपण भारी देवा’ या चित्रपटाची घोषणा केली आहे. आपल्या आयुष्यातील आईच्या अनन्य साधारण महत्वाला अधोरेखित करणारा हा चित्रपट येत्या २०२५ ला प्रेक्षकांच्या भेटीला येणार असल्याचं देखील सांगण्यात आलं आहे. (Aaipan Bhari Deva Movie)
चित्रपटाचे दिग्दर्शक केदार शिंदे यांनी त्यांच्या इंस्टाग्राम वरुन चित्रपटाचे पोस्टर शेअर करत या बद्दल माहिती दिली आहे. केदार शिंदे यांनी पोस्टच्या कॅप्शनमध्ये लिहिलंय “प्रत्येक घरातल्या बाईपणाच्या भारी गोष्टीनंतर दिग्दर्शक केदार शिंदे आणि जिओ स्टुडिओज घेऊन येत आहेत प्रत्येक घरातल्या आईपणाची भारी गोष्ट ‘आईपण भारी देवा’”. महिला दिनाचे औचित्य साधत केदार शिंदे यांनी या चित्रपटाची घोषणा केली आहे. केदार यांनी शेअर केलेल्या पोस्टनुसार हा चित्रपट २०२५ मध्ये प्रेक्षकांच्या भेटीला येणार असल्याचं दिसतंय.
आणखी वाचा
केदार शिंदे यांनी दिग्दर्शित केलेला ‘बाईपण भारी देवा’ हा चित्रपट प्रेक्षकांची मनं जिंकली. या चित्रपटात अभिनेत्री सुकन्या मोने, सुचित्रा बांदेकर, शिल्पा नवलकर, वंदना गुप्ते, दीपा परब यासह इतर कलाकारांनी आपल्या सुंदर अभियाने चित्रपटाच्या यशाचा पाया रचला. ‘बाईपण भारी देवा’ चित्रपटात स्त्रियांच्या आयुष्यातील अडचणी, चढ-उतार मांडल्यानंतर आता ‘आईपण भारी देवा’ या चित्रपट सज्ज झाला आहे आयुष्यतील आईचं महत्व सांगण्यासाठी.
‘आईपण भारी देवा’ या चित्रपट नक्की कोण कोण कलाकार दिसणार या बाबत प्रेक्षक उत्सुक दिसत आहे. तसेच चित्रपटाचे दिग्दर्शन केदार शिंदे करत असून चित्रपटाच्या निर्मितीची धुरा ज्योती शिंदे, बेला शिंदे यांनी सांभाळली आहे. तसेच चित्रपटाचे लेखन वैशाली नाईक – ओंकार दत्त यांनी केले असल्याचं समजतंय. केदार शिंदे यांनी शेअर केलेल्या या पोस्टवर चाहत्यांसह सिनेसृष्टीतील अन्य कलाकारांनी देखील केदार यांचं अभिनंदन करत त्यांना शुभेच्छा दिल्या आहेत.