मनोरंजन विश्वातील प्रतिष्ठित मानला जाणारा ‘बाफ्टा २०२४’ पुरस्कार सोहळा नुकताच पार पडला. जगभरातील चाहते आणि कलाकार या पुरस्कार सोहळ्याची आतुरतेने वाट पाहत होते. ‘ब्रिटिश अकादमी ऑफ फिल्म अँड टेलिव्हिजन आर्ट्स’ अर्थात ‘बाफ्टा’च्या यंदाच्या पुरस्कार सोहळ्यामध्ये अनेक कलाकारांचा एक वेगळा अंदाज पाहायला मिळाला. या पुरस्कार सोहळ्यामध्ये सर्वोत्कृष्ट चित्रपट आणि कलाकारांना गौरविण्यात येते. पण या वर्षीचा ‘बाफ्टा’ पुरस्कार सोहळा भारतीयांसाठी अगदी खास होता. या पुरस्कार सोहळ्यासाठी केवळ हॉलिवूड स्टार्सनीच नाही तर बॉलिवूडमधील आघाडीची अभिनेत्री दीपिका पदुकोणनेदेखील पुरस्कार प्रदान करण्यासाठी हजेरी लावली होती. दीपिकाच्या भारतीय लूकने सर्वांचेच लक्ष वेधले गेले. या पुरस्कार सोहळ्यात पुन्हा एकदा ‘ओपनहायमर’ या चित्रपटाची धूम पाहायला मिळाली. या चित्रपटाने अनेक पुरस्कार पटकावले. (Deepika Padukone saree look)
दीपिकाने २००७ साली बॉलिवूडमध्ये पदार्पण केले. दीपिकाने बॉलिवूडमध्ये काम करण्याबरोबरच अभिनयाच्या जोरावर हॉलिवूडमध्येही आपले वेगळे स्थान निर्माण केले आहे. ‘बाफ्टा २०२४’ च्या निमित्ताने दीपिकाने ऑफ व्हाईट रंगाची चमकदार साडी नेसली होती. या साडीमध्ये दिपीकाचा कातिलाना अंदाज दिसून येत होता. पण दीपिकाचा साडीमधील फोटो व्हायरल झाल्यापासून ती गरोदर असल्याच्या चर्चांना उधाण आलं आहे.
‘बाफ्टा २०२४’ च्या पुरस्कार सोहळ्याला हॉलिवूडमधील दिग्गज कलाकारांसमवेत भारतीय अभिनेत्री दीपिकाने हजेरी लावली होती. यावेळी दीपिकाने फिक्या पांढऱ्या रंगाची चमकदार साडी नेसली होती. पण जेव्हा ती फोटोसाठी पोज देत होती तेव्हा तिने पोटावर पदर घेतला. दीपिकाचा हा फोटो सोशल मीडियावर व्हायरल झाला असून नेटकरी अनेक तर्कवितर्क मांडत आहेत. याबद्दल एक नेटकरी म्हणाला की, “दीपिका गरोदर आहे असं वाटतं, तिचे पोट दिसत आहे आणि तिच्या हाताची ठेवणही तशीच काहीशी आहे”.
यावर इतर नेटकऱ्यांनीदेखील कमेंट करत म्हंटले की, “हा चर्चा करण्याचा विषय नाही”. तर काही नेटकरी म्हणाले की, “तिने सब्यासाची ब्रँडची साडी नेसली आहे आणि ती जड असल्याने निऱ्या झाकण्यासाठी पदर असा घेतला आहे”. तर काही नेटकऱ्यांचे असे म्हणणे आहे की, “दीपिका-कतरिना आपल्या साडीचा पदर अशाच पध्दतीने पकडतात. त्यामुळे त्या गरोदर असल्याच्या चर्चा केल्या जातात”. पण यामागचं सत्य नेमकं काय? हे अद्यापही उघड झालेलं नाही.