उद्योगपती मुकेश अंबानी आणि नीता अंबानी यांच्या घरी लगीनघाई सुरु झालेली पाहायला मिळत आहे. या शाही विवाहसोहळ्याचे आता अवघे काही दिवस शिल्लक आहेत. त्यांचा धाकटा मुलगा अनंत अंबानी १२ जुलै रोजी राधिका मर्चंटसह लग्नबंधनात अडकणार आहे. १२ जुलै रोजी ते मुंबईतील जिओ वर्ल्ड कन्व्हेन्शन सेंटरमध्ये सात फेरे घेणार असल्याचं समोर आलं आहे. गुजरातच्या जामनगरमध्ये आधी प्री-वेडिंग पार्टी आणि नंतर क्रूझवर पार्टी झाल्यनानंतर आता संपूर्ण अंबानी कुटुंब लग्नाच्या तयारीत व्यस्त आहे. नीता अंबानी यांनी आपल्या मुलाच्या लग्नाची पहिली पत्रिका काशी येथे बाबा विश्वनाथ यांच्या चरणी अर्पण केली आहे. त्यानंतर अनंत आपल्या खास मित्रांना, पाहुण्यांना आमंत्रित करण्यासाठी निघाला आहे. (anant ambani wedding invitation card)
अजय देवगणनंतर तो आता अक्षय कुमारच्या घरी पोहोचला असून त्याला चांदीची मंदिरासारखी लग्नपत्रिका दिली. सोशल मीडियावर लग्नपत्रिकेचे व्हिडीओ व्हायरल होत आहेत. यांत शिव, गणेश व राम यांच्या मूर्ती आहेत. मिळालेल्या माहितीनुसार, अनंत अंबानी व राधिका मर्चंट यांचा विवाह सोहळा १२ जुलैला सुरु होऊन १४ तारखेला संपणार आहे. या सोहळ्यात देशातील दिग्गज व्यक्ती सहभागी होणार आहेत. अनंत स्वत: त्याच्या लग्नाची आमंत्रण पत्रिका वाटण्यासाठी निघाला आहे. अजय देवगण, अक्षय कुमार यांच्या घरी जात अनंतने स्वतः पत्रिका दिलेली पाहायला मिळाली.
अनंत व राधिकाच्या लग्नाची पत्रिका सोशल मीडियावर व्हायरल होत आहे. जी खूपच अनोखी आहे. त्यात अनेक हिंदू देवी-देवतांच्या मूर्ती व फ्रेम आहेत. या पत्रिकेत छोटेसे चांदीचे मंदिरही पाहायला मिळत आहे. लग्न पत्रिकेची ही पेटी उघडताच बॅकग्राउंडमध्ये एक हिंदी मंत्रही वाजत आहे. पहिल्या दिवशी एक शुभ विवाह सोहळा होणार असल्याचे सांगण्यात येत आहे. या खास दिवसासाठी भारतीय पारंपरिक ड्रेस कोडला प्राधान्य दिलं आहे. दुसऱ्या दिवशी १३ जुलै रोजी आशीर्वाद समारंभ होईल, ज्यामध्ये पाहुण्यांना भारतीय औपचारिक पोशाख परिधान करुन यावे लागेल. १४ जुलै रोजी लग्नसोहळा आणि मंगल उत्सव होणार आहे. या फंक्शनमध्ये भारतीय आकर्षक ड्रेस कोड आहे.
यापूर्वी एक ते तीन मार्च या कालावधीत गुजरातमधील जामनगरमध्ये अनंत व राधिकाची प्री-वेडिंग पार्टी आयोजित करण्यात आली होती, ज्यामध्ये केवळ देशातीलच नाही तर परदेशी पाहुणेही उपस्थित होते. यावेळी ग्लोबल पॉप स्टार रिहानाने जबरदस्त परफॉर्मन्स दिला. यानंतर २९ मे ते १ जून या कालावधीत क्रूझ पार्टी झाली, जी इटलीमध्ये संपन्न झाली. या पार्टीलाही जगभरातील प्रसिद्ध व्यक्तींनी हजेरी लावली होती. ही पार्टी ७५०० कोटी रुपयांच्या क्रूझवर झाल्याचे सांगण्यात आले.
