Like Aani Subscribe Movie : मराठी सिनेसृष्टीत सध्या नानाविध विषयांवरील आधारीत चित्रपटांची निर्मिती होत आहे. सध्याच्या सोशल मीडियाच्या जमान्यामध्ये ‘लाईक आणि सबस्क्राईब’ हे वाक्य सर्वश्रृत झालं आहे. अनेकदा आपण गाण्यांमधून किंवा कोणाच्या बोलण्यातूनही हे असे अनेक शब्द ऐकले आहेत. तसंच रोजच्या मोबाइलच्या वापरातही हे शब्द येतात. अशातच काही दिवसांपूर्वी सोशल मिडीयावर एका चित्रपटाचे उत्सुकता वाढवणारे पोस्टर झळकले होते. ‘लाईक आणि सबस्क्राईब’ असे नाव असलेल्या या चित्रपटाच्या पोस्टरमध्ये अमृता खानविलकर, अमेय वाघ आणि ‘तुमची मुलगी काय करते?’ या मालिकेत महत्वपूर्ण भूमिका साकारणारी अभिनेत्री जुई भागवत आहे. ‘लाईक आणि सबस्क्राईब’ चित्रपटाच्या माध्यमातून जुई मोठ्या पडद्यावर पदार्पण करत आहे. (Like Aani Subscribe Movie Teaser)
पोस्टर प्रदर्शित झाल्यानंतर या चित्रपटाचा टीझर समोर आला आहे. हा टीझर अंगावर शहारा आणणारा आहे. या टिझरमध्ये जुई भागवत एका व्लॅागरच्या भूमिकेत दिसत असून ती एका मोठ्या संकटात अडकल्याचेही पाहायला मिळत आहे. तर दुसरीकडे अमृता खानविलकरही पोलिसांच्या मदतीने कशाचा तरी शोध घेत आहे. त्यामुळे या सगळ्याचा परस्परांशी काही संबंध आहे का? तसंच यात मृतदेह आणि एका खुनाचाही उल्लेख करण्यात आला आहे, त्यामुळे हे प्रकरण नक्की काय आहे? कोणी कोणाचा खून केला? अमृता खानविकार कसल्या आणि कोणत्या पुराव्यांच्या शोधात आहे? या आणि अशा अनेक प्रश्नांची उत्तरे आपल्याला ‘लाईक आणि सबस्क्राईब’ या चित्रपटामधून मिळणार आहेत.
काही दिवसांपूर्वी ‘लाईक आणि सबस्क्राईब’ चित्रपटाचे एक पोस्टर प्रदर्शित झाले होते. त्यात अमृता खानविलकर, जुई भागवत आणि अमेय वाघ यांचा सेल्फी होता. या पोस्टरमध्ये सेल्फीतील चेहरे आणि त्यांचे प्रत्यक्षातील चेहऱ्यावरील हावभाव खूप वेगळे होते. त्यामुळे यामागे काय रहस्य दडले आहे, हे जाणून घेण्याची अनेकांना उत्सुकता लागली होती. त्यात नुकत्याच प्रदर्शित झालेल्या टीझरनेही प्रेक्षकांच्या मनात आता अनेक प्रश्न निर्माण केले आहेत. या सगळ्या प्रश्नांची उत्तरे प्रेक्षकांना येत्या १८ ऑक्टोबर रोजी मिळणार आहेत.
नितीन वैद्य प्रॉडक्शन्स प्रस्तुत आणि अभिषेक मेरूकर प्रॉडक्शन्स यांच्या सहकार्याने प्रदर्शित होणाऱ्या ‘लाईक आणि सबस्क्राईब’ या चित्रपटाचे निर्माते नितीन प्रकाश वैद्य, अभिषेक मेरूकर आहेत. तसंच ‘लाईक आणि सबस्क्राईब’चे लेखन व दिग्दर्शन अभिषेक मेरूकर यांनी केले आहे. या चित्रपटात अमेय वाघ, जुई भागवत, अमृता खानविलकर, शुभंकर तावडे, विठ्ठल काळे या कलाकारांच्या प्रमुख भूमिका आहेत. येत्या १८ ऑक्टोबर रोजी हा चित्रपट सर्वत्र प्रदर्शित होणार आहे.
