Sonali Bendre On Cancer : आजारपण कधी ओढावेल याची शाश्वती नाही. कधी काय होईल याची कोणीही खात्री देऊ शकत नाही. आजकाल कॅन्सर सारखे आजाराचं सावट अधिक वाढले असल्याचे पाहायला मिळते. सर्वसामान्यांप्रमाणेच अनेक कलाकार मंडळींनाही या आजाराचा सामना करावा लागतोय. अशी अनेक कलाकार मंडळी आहेत ज्यांना कॅन्सरसारख्या आजाराला सामोरे जावे लागले आणि यावर त्यांनी पूर्णतः मात करत ही लढाई जिंकलेली पाहायला मिळाली. यापैकीच एक अभिनेत्री म्हणजे सोनाली बेंद्रे. सोनाली बेंद्रेनेही कॅन्सर सारख्या आजाराला सामोरे जात ही लढाई जिंकली.
नुकत्याच एका दिलेल्या मुलाखतीत सोनालीने कर्करोगाबाबत भाष्य केलं आहे. स्त्रीरोगशास्त्रातील रोबोटिक सर्जरी या विषयावर चर्चा करण्यासाठी रोबोटिक स्त्रीरोग शस्त्रक्रिया क्षेत्रातील तज्ज्ञ एकत्र आले होते. यावेळी सोनाली म्हणाली, “जेव्हा मला कर्करोगाचं निदान झालं होतं, तेव्हा याबद्दल फार बोललं जात नव्हतं. लोक याबद्दल (C) या शब्दाचा उल्लेख करुन बोलायचे. मला पूर्वी हे जाणवलं नाही की कर्करोग इतका सामान्य झाला आहे. मी याबद्दल बोलल्यानंतर अनेकांनी माझ्याशी संपर्क केला आणि तेसुद्धा यातून जात असल्याचं सांगितलं. लोक याबद्दल फार बोलायचे नाहीत आणि हा त्रास सहन करायचे. कर्करोग झाला यात माझा दोष नाही, मग मी ते लपवून का ठेवायचं?”.
आणखी वाचा – रुबीना दिलैकच्या वडिलांचा अपघात, सफरचंद विकून परतताना दुर्घटना, पाठीमागून कारला धडक दिली आणि…
सोनाली पुढे म्हणाली, “जर तुम्ही आता पाहिलंत तर असं दिसतं की, पूर्वीप्रमाणे लोक आता याबद्दल बोलताना (C) शब्दाचा वापर करत नाही, तर जे आहे त्याच नावाने बोलतात”. पुन्हा शरीरात पसरण्याबद्दल सोनाली म्हणाली, “भीती अजूनही आहेच मी ते नाकारणार, नाही. पण मी नियमितपणे स्कॅन करत असते. काळजी घेत असते. माझ्या बाबतीत असं झालेलं की, कर्करोग झालाय हेच मला फार उशिरा समजलं होतं. कर्करोगाच्या चौथ्या स्टेजला असताना मला याबाबत समजलं होतं, त्यामुळे तुम्ही चेकअप करत राहा. जर तुम्ही वेळीच त्यावर उपचार केले तर त्यातून लवकर बाहेर याल”.
आणखी वाचा – ‘दशावतार’च्या गूढ कथेमागे काय दडलंय?, टिझर पाहून वाढली उत्सुकता, चित्रपटात कलाकारांची मांदियाळी आणि…
सोनाली बेंद्रेला जुलै २०१८ मध्ये ‘मेटास्टॅटिक कॅन्सर’चे निदान झाले होते आणि त्यावर उपचार करण्यासाठी ती न्यूयॉर्कमध्ये गेली होती. कर्करोगाशी यशस्वीपणे लढल्यानंतर, २०२१ मध्ये ती कॅन्सरमुक्त झाली आणि तेव्हापासून ती आपल्या अनुभवांवरुन इतरांना प्रेरणा देत आहेत.
