तब्बल सात वर्ष एकमेकांच्या प्रेमात आकंठ बुडालेल्या सोनाक्षी सिन्हा व झहीर इक्बाल यांनी अखेर लग्नगाठ बांधली आहे. बरेच दिवसांपासून सोनाक्षी व झहीरच्या लग्नाची चर्चा सुरु असलेली पाहायला मिळाली. अखेर या चर्चांना पूर्णविराम देत सोनाक्षी व झहीर हे दोघे लग्नबंधनात अडकले आहेत. २३ जून रोजी त्यांच्या रिलेशनशिपला सात वर्ष पूर्ण होताच त्यांनी लग्न केले आहे. जवळचे नातेवाईक, कुटुंबीय व सिनेसृष्टीतील मित्रपरिवार यांच्या उपस्थितीत दोघांनी लग्न केले. (Sonakshi Sinha Zaheer Iqbal Wedding)
सोनाक्षी व झहीर नोंदणी पद्धतीने विवाह करुन लग्नबंधनात अडकले आहेत. २३ जून २०१७ रोजी या जोडीने त्यांच्या नात्याला सुरुवात केली. अखेर सात वर्षांनी त्यांनी कुटुंबाच्या समवेत शाही लग्न केले. सोनाक्षी व झहीर यांनी अत्यंत साधेपणाने लग्नसोहळा उरकला. नोंदणी पद्धतीने लग्न करताना त्यांनी ना कोणताच अवाढव्य खर्च वा ना भरजरी कपडे परिधान केले होते. घरच्या घरीच त्यांनी ही विधी पार पाडली.
लग्नासाठी सोनाक्षीने पांढऱ्या रंगाची डिझाइनर साडी नेसली होतं. तर झहीरने पत्नीच्या साडीला मॅचिंग असा सदरा परिधान केला होता. त्याच्या सदऱ्यावरही सुंदर असं नक्षीकाम केलं होतं. या सगळ्यात सोनाक्षीच्या सुंदर साडीने सर्वांचं लक्ष वेधून घेतलं. कारण ही खास साडी तिच्या आईची म्हणजेच पूनम यांची होती. यावर भरजरी दागिने न घालता तिने नाजूक असा एक हार घातला होता. आणि केसात पांढऱ्या रंगाची फुलं माळली होती. आईची सुंदर अशी साडी, दागिने यांमध्ये सोनाक्षी खूपच सुंदर दिसत होती.
सोनाक्षी व झहीरच्या लग्नातील बरेच फोटो, व्हिडीओ सोशल मीडियावर व्हायरल होत आहेत. चाहतेमंडळी त्यांच्यावर शुभेच्छांचा वर्षाव करताना दिसत आहेत. दोघेही त्यांच्या लग्नात खूप खुश असल्याचेही दिसले. शिवाय सोनाक्षीचे वडील शत्रुघ्न सिन्हा हेदेखील लेकीचं लग्न एन्जॉय करताना दिसले.
