Nivedita Saraf Post : मराठी सिनेसृष्टीत सध्या एकामागून एक आनंदाच्या बातम्या कानावर पडत आहेत. मराठी प्रेक्षकांचे लाडके मामा यांचा नुकताच पद्मश्री पुरस्काराने सन्मान करण्यात आला. संबंध देशभरातून अशोक सराफ यांच्यावर शुभेच्छांचा वर्षाव होताना पाहायला मिळत आहे. ज्येष्ठ अभिनेते अशोक सराफ यांना अभिनयाचा मानाचा पद्मश्री पुरस्कार देऊन सन्मान करण्यात आला. अशोक सराफ यांच्या प्रत्येक चाहत्यासह संपूर्ण महाराष्ट्रासाठी हा अभिमानाचा क्षण होता. राष्ट्रपती द्रौपदी मुर्मू यांच्या हातून अशोक सराफ यांना पद्मश्री पुरस्कार देण्यात आला. कला क्षेत्रातील उल्लेखनीय कामगिरीसाठी त्यांना हा पुरस्कार देण्यात आला. या पुरस्कारानंतर हा खास क्षण व्हिडीओच्या माध्यमातून शेअर करत त्यांनी आपल्या भावनादेखील शेअर केल्या आहेत.
आजवर अशोक सराफ यांनी त्यांच्या विनोदाच्या अचूक टायमिंगने रसिक प्रेक्षकांच्या मनात घर केलं. मराठीच नव्हे तर हिंदी भाषेतही आपला ठसा उमटवणारे अशोक मामा लोकप्रिय झाले. या त्यांच्या अभिनय कारकिर्दीत त्यांच्या पत्नी निवेदिता सराफ यांचा मोलाचा वाटा आहे. स्वतः अभिनेत्री असूनही निवेदिता यांनी अशोक सराफांना त्यांची स्वप्न पूर्ण होण्यास वेळोवेळी सपोर्ट केला. अशोक सराफ यांना दिल्ली येथे पद्मश्री पुरस्कार प्रदान करण्यात आला यावेळीही निवेदिता त्यांच्यासह उपस्थित होत्या.
पती अशोक सराफ यांना पुरस्कार मिळाल्यानंतर पत्नी निवेदिता सराफ यांनी सोशल मीडियावर पोस्ट शेअर करत त्यांचं कौतुक केलं आहे. दिल्लीतील राष्ट्रपती भवनाबाहेरील फोटो शेअर करत निवेदिता यांनी ही खास पोस्ट लिहिली आहे. त्यांनी पोस्ट शेअर करत म्हटलं आहे की, “हा क्षण शब्दात मांडता येणार नाही असा आहे. तुझा प्रत्येक प्रवास, प्रत्येक टप्पा तुझ्या मेहनतीचा, तुझ्या समर्पणाची साक्ष आहे. माझ्या आयुष्यातला हिरो, आता देशाचाही अभिमान! माझा अभिमान अनंत पटीने वाढला आहे. खूप खूप अभिनंदन”.
पद्मश्री पुरस्कारानंतर अशोक सराफ यांनी आपल्या भावना शेअर करत म्हटलं की, “पद्मश्री हा सन्मान माझ्या जीवनातील एक विशेष क्षण आहे. मी महाराष्ट्र शासनाचे आभार मानतो. माझ्या कुटुंबीयांचे, सहकलाकारांचे आणि प्रेक्षकांचेही आभार. तुमच्या प्रेमाशिवाय हे शक्य झालं नसतं. तुमचा प्रेम आणि आशिर्वाद कायम असाच राहू द्या”.
