Jyotsna Tamrakar Got Looted In Train : हल्ली तर रेल्वे अपघाताच्या बातम्या सतत कानावर पडत आहेत. इतकंच नाही तर रेल्वेत होणारी मारामारी, चोऱ्या या बातम्याही सतत कानावर येत असतात. रेल्वेतील चोऱ्यांचे प्रमाण तर अधिकच वाढले आहे. अशातच रेल्वेतील चोरीची घटना आता छत्तीसगढमधून समोर आली आहे. इतकंच नाही तर या घटनेला एका अभिनेत्रीला सामोरे जावे लागले आहे. छत्तीसगढ फिल्म इंडस्ट्रीतील एका अभिनेत्रीला लुटण्याचा प्रयत्न चालत्या ट्रेनमध्ये झाला असल्याचं समोर आलं आहे. अभिनेत्री रीवा शहरातून, विलासपूरला जाणाऱ्या ट्रेननं प्रवास करत होती. त्यादरम्यान अभिनेत्रीसोबत ही घटना घडली. सोशल मीडियावर व्हिडीओ शेअर करत तिने याबाबत माहिती दिली आहे.
ज्योत्स्ना ताम्रकार असं या अभिनेत्रीचं नाव असून व्हिडिओ शेअर करत तिने तिच्याबरोबर घडलेल्या या घटनेची सविस्तर माहिती दिली आहे. शिवाय चोरी झाल्यावर तक्रार केल्यानंतरही तिच्या मदतीस पोलीस अधिकारी आले नाहीत यामुळे तिने थेट प्रशासनाला जाब विचारला आहे. ज्योत्स्नाने रेल्वे प्रशासनानं या गंभीर घटनेची दखल घेण्याची विनंती केली असून एखादी टोळी ही लूटमार करत असावी अशी शंकाही बोलून दाखविली आहे.
अभिनेत्रीने व्हिडीओ शेअर करत म्हटलं की, “१९ जूनला रात्री रीवा ते विलासपूर जाणाऱ्या ट्रेनने प्रवास करत होते. रात्री जवळपास २ वाजता ट्रेन कटनी रेल्वे स्टेशनला पोहोचली. कटनी स्टेशन ट्रेनने सोडल्यानंतर काहीच किलोमीटर दूर ट्रेन आऊटरमध्ये थांबली. तेव्हाच एका व्यक्तीने खिडकीतून माझी पर्स आणि मोबाईल चोरण्याचा प्रयत्न केला. त्याचा प्रयत्न अयशस्वी ठरल्यावर त्या बदमाशाने मला डोळ्याच्या खाली मुक्का मारला. ट्रेन सुटल्यावर समजलं की कोच s1 ते s5 पर्यंत काही प्रवाशांचं सामान लुटलं. त्यामुळे इतर प्रवासीही घाबरले होते. त्यानंतर मी कशीतरी विलासपूरला पोहोचले. त्यानंतर एक तासानंतरही मला आरपीएफ आणि जीआरपीची मदत मिळाली नाही”.
आणखी वाचा – सासू-सासऱ्यांची साथ, मुलींना घडवण्यात त्यांचा हात अन्…; अलका कुबल यांना सासरची ओढ, कुटुंबालाच यशाचं श्रेय
शेवटी या घटनेनंतर तिनं रेल्वे हेल्पलाईनला फोन केला आणि त्यांना लुटण्यात आल्याचं कळवलं. अभिनेत्रीनं आरोप केला आहे की, “तक्रारीनंतरही कुणीही तिच्या मदतीला आलं नाही. विलासपूर स्टेशनला पोहोचल्यावरही तिला संबंधित अधिकाऱ्यांची बराच वेळ वाट पाहावी लागली. ट्रेनमध्येही आरपीएफ किंवा जीआरपीचा कोणताही सैनिक हजर नव्हता.
