‘पवित्र रिश्ता’ या हिंदी मालिकेच्या माध्यमातून घराघरांत पोहोचलेली मराठमोळी अभिनेत्री अंकिता लोखंडे. काही दिवसांपूर्वीच या अभिनेत्रीला पितृशोक झाला. एक महिन्यापूर्वी म्हणजेच १२ ऑगस्टला अंकिताचे वडील शशिकांत लोखंडे यांचं निधन झालं. वयाच्या ६८ व्या वर्षी त्यांनी अखेरचा श्वास घेतला. वडिल्याच्या निधनानंतर अंकिता व तिच्या कुटुंबियांना धक्का बसला होता. वडिलांबरोबर अंकिताचं खूप घट्ट असं बॉण्डिंग होत. सोशल मीडियावर तिने शेअर केलेल्या वडिलांसंबंधीत पोस्टवर चाहत्यांकडून नेहमी प्रेम मिळायचं. मात्र आता चाहत्यांनी अंकिताच्या एका पोस्टवर नाराजी व्यक्त केली आहे. (Ankita Lokhande Troll)
वडिलांच्या निधनाला एक महिना झाला नाही तोवर अंकिताने एका गाण्यावर डान्स करतानाचा व्हिडीओ पोस्ट केला आहे. त्यामुळे अंकिता चांगलीच ट्रोलिंगच्या कचाट्यात अडकली आहे. अंकिता लोखंडने तिच्या इन्स्टाग्रामवर एक व्हिडीओ शेअर केला आहे. या व्हिडीओत ती ‘पिया तोसे नैना लागे रे’ या गाण्यावर ठेका धरताना दिसत आहे. या व्हिडीओला तिने आकर्षक कॅप्शनही दिलं आहे.
“मी खूप दिवसांनी माझ्याच तालावर नाचत आहे. निशू घरी आल्याबद्दल आणि मला हे करायला लावल्याबद्दल तुझे धन्यवाद. या सुंदर परफॉर्मन्सचे दिग्दर्शन निशांत भट्ट याने केले आहे”, असं कॅप्शन देत ठेका धरतानाचा व्हिडीओ अंकिताने इन्स्टाग्रामवरून शेअर केला आहे.
अंकिताच्या या व्हिडीओवर चाहत्यांनी नाराजी दर्शवत तिला चांगलंच ट्रोल केलं आहे. तिच्या या व्हिडीओवर एका चाहतीने कमेंट करत “तुझे वडील जाऊन एक महिनाही झालेला नाही आणि तू डान्स करते”, असं म्हटलं आहे. तर आणखी एका चाहतीने “तुझ्या वडिलांच्या निधनानंतर किमान महिनाभर तरी धीर धर”, अशी कमेंट करत अंकिताला धारेवर धरलं आहे. “वडिलांच्या निधनाचा काहीही फरक पडलेला दिसत नाही”, असंही एकाने म्हटले आहे. तर आणखी एका नेटकऱ्याने “खरंच तुझी लाज वाटते, तुझे वडील महिन्याभरापूर्वी गेले आणि तू मात्र डान्स करतेस”, अशी कमेंट केली आहे.