‘स्वराज्यरक्षक संभाजी’ या लोकप्रिय मालिकेतून छत्रपती शिवाजी महाराजांची भूमिका प्रेक्षकांच्या मनामनात पोहोचवणारे कलाकार म्हणजे शंतनू मोघे. त्यांनी साकारलेल्या महाराजांच्या भूमिकेचं प्रेक्षकांनी विशेष कौतुक केलं. ते ‘आई कुठे काय करते’ या मालिकेमध्येही झळकले होते. पण शंतनू यांनी साकारलेली महाराजांची भूमिका अत्यंत लोकप्रिय ठरली. त्यांनी आजवर अनेक विविध भूमिका साकारल्या आहेत त्यामुळे त्यांचा चाहतावर्ग बराच मोठा आहे. त्यांच्याविषयी जाणून घेणं त्यांच्या चाहत्यांना नेहमीच आवडतं. शंतनूच्या वेगवेगळ्या आवडीनिवडी आहेत. त्यातील एक वेगळी आवड त्यांनी ‘इट्स मज्जा’ला दिलेल्या एका मुलाखतीत सांगितली.(Shantanu moghe do more shopping)
शंतनू यांनी मराठी कलासृष्टीत आपली वेगळी जागा निर्माण केली आहे. ते सोशल मीडियावर बरेच सक्रिय असतात. एका मुलाखतीत त्यांनी आपल्या वेगळ्या आवडीबद्दल भाष्य केलं. ते त्याबद्दल सांगतात, “मला बऱ्याच गोष्टी आवडतात. त्यातील एक गोष्ट म्हणजे शॉपिंग. मी न थकता शॉपिंग करू शकतो. मजेची गोष्ट म्हणजे पुरुषांना याची आवड नसते. पण मी मात्र एखादी गोष्ट मिळवण्यासाठी न थकता शॉपिंग करु शकतो. मला वेगळ्या गोष्टींचं कलेक्शन करायला आवडतं. त्यामुळे माझ्या घरात तुम्हाला अशा गोष्टी बऱ्याच दिसतील”.
याबद्दलचा एक किस्सा सांगताना ते म्हणाले, “ आम्ही एक गोष्ट घ्यायला क्रॉफर्ड मार्केटला गेलो होतो. तिथल्या दुकानात ती गोष्ट नव्हती. त्या दुकानादाराने आम्हाला दुसरा पत्ता दिला. तो पत्ता शोधत शोधत आम्ही तिथे पोहोचलो खरे पण त्यांच्याकडे आम्हाला हवी तशी वस्तू नव्हती. आम्ही तिथे थांबून दुकानदाराला सांगून हवी तशी करुन घेतली. पण ती गोष्ट घेतल्याशिवाय आम्ही काही घरी काही गेलो नाही”.
“मला शॉपिंग खूप जास्त आवडते. एकवेळ बायका थकतील पण मी नाही. त्यांच्यापेक्षा जास्त मी शॉपिंग करु शकतो. एवढं मात्र नक्की! त्यामुळे माझ्या घरात अशा विविध गोष्टी दिसतील. माझ्या बायकोलाही याची आवड आहे त्यामुळे आम्ही दोघे मिळून हा पसारा गोळा करतो”, स्वतःच्या या वेगळ्या आवडीबद्दल शंतनू यांनी खुलासा केला.शंतनू मालिकांमध्ये दिसतातच पण त्यांचा नाटकांकडेही बराच कल आहे. सध्या शंतनू नाटकांच्या प्रयोगात व्यग्र असून त्यांच्या ‘सफरचंद’ या नाटकाचा प्रयोग सुरु आहे.