Sankarshan Karhade Fans : मराठी सिनेविश्वातील लोकप्रिय अभिनेत्यांपैकी एक म्हणजे संकर्षण कऱ्हाडे. संकर्षण कऱ्हाडेचा खूप मोठा चाहतावर्ग आहे. आजवर संकर्षणने मालिका, चित्रपट, नाटक यांमधून महत्त्वाची भूमिका साकारत प्रेक्षकांच्या मनात घर केलं. सोशल मीडियावरही संकर्षण बऱ्यापैकी सक्रिय असतो. नेहमीच तो काही ना काही शेअर करत चाहत्यांच्या संपर्कात राहत असतो. अशातच आता संकर्षणने त्याच्या इंस्टाग्राम अकाउंटवर शेअर केलेल्या एका व्हिडीओने साऱ्यांचं लक्ष वेधून घेतलं आहे. नाटकाच्या प्रयोगादरम्यानचा एक व्हिडीओ त्याने इंस्टाग्रामवर शेअर केला आहे. यामध्ये संकर्षणला भेटायला दोन वयोवृद्ध आजी आल्याचं दिसत आहे. त्याने ही फॅन मुमेंट शेअर करत त्याचा हा अनुभव इंस्टाग्रामवर शेअर केला आहे.
संकर्षणला नाटकाच्या प्रयोगादरम्यान ८० च्या आसपास असलेल्या दोन वयोवृद्ध आजी भेटायला आल्या होत्या. महत्त्वाचं म्हणजे त्या नाटकासाठी नाही तर फक्त संकर्षणला भेटण्यासाठी आल्या होत्या. संकर्षणने त्यांच्याशी गप्पा मारतानाचा व्हिडीओ शेअर केला आहे. या व्हिडीओमधून त्या आजी, “तुझ्या कविता खूप छान असतात, विशेषतः तुझी आईवरची कविता आम्हाला खूप आवडली”, असं म्हणताना दिसत आहे. संकर्षणने त्यांना नाटक पाहण्यासाठी थांबता का असं विचारताच त्यांनी आम्हाला उशीर होईल असं सांगितलं.
परंतु, तेव्हा त्यांच्यासह आलेल्या एका व्यक्तीने सांगितलं की, “आमचं एक वृद्धाश्रम आहे, तिथल्या या आजी आहेत”. पुढे त्या दोन आजींनी सांगितलं की, “आम्हाला केवळ तुला भेटायचं होतं, कधीपासून आमची इच्छा होती”. संकर्षणने पुढे या आजींना चहा वगैरे घेणार का असं विचारलं असता त्यांनी त्यालासुद्धा नकार दिला. आणि जाईपर्यंत त्या एकच म्हणत होत्या, “आम्हाला काही नको फक्त तुला भेटण्यासाठी म्हणून इथे आलो”, असं सांगितलं. संकर्षणचा हा व्हिडीओ पाहून फॅन मुमेंटचा अनुभव येतोय.
हा व्हिडीओ शेअर करत संकर्षणने कॅप्शन देत म्हटलं की, “आज पुण्यात ‘नियम व अटी लागू’ प्रयोगाआधी दोन आजी माझ्याकडे आल्या. दोघीही वयाने ८० आसपास असतील. मला वाटलं प्रयोगाला आल्या असतील. तर म्हणाल्या, “आम्ही वृद्धाश्रमात राहातो आम्हाला वेळत परत गेलं पाहिजे आणि तीन तास आम्ही तब्येतीमुळे बसू शकत नाही पण तुला फक्त भेटायला आलो आहे. भरभरुन बोलल्या. आशीर्वाद दिले आणि निघून गेल्या. फक्त भेटीसाठी रिक्षा करुन आल्या होत्या. मी मुद्दाम जाताना त्यांना माझ्या गाडीने पाठवलं. फार गोड वाटलं”. हा व्हिडीओ पाहून चाहते संकर्षणच भरभरुन कौतुक करत आहेत. आणि त्याच्या व्हिडीओला पसंती दर्शवित आहेत.
