सध्या सोशल मिडियावर ‘आठवी-अ’ या वेबसीरिजची चर्चा सुरु आहे. केवळ खेड्यापाड्यातून नव्हे तर शहरातूनही या वेबसीरिजला भरभरुन प्रतिसाद मिळताना पाहायला मिळत आहे. ग्रामीण जीवनशैलीचं हुबेहूब वर्णन करणारी ही वेबसीरिज अनेकांच्या मनावर राज्य करत आहे. एक भाग संपला की चाहतेमंडळी आगामी वेबसीरिजच्या भागाकडे डोळे लावून बसलेले असतात. ‘आठवी-अ’ वेबसीरिजच्या भरघोस प्रतिसादानंतर नुकताच या वेबसीरिजची सक्सेस पार्टी अगदी थाटामाटात पार पडली. (Aathavi A Webseries success party)
साताऱ्यातील शाहू मंदिर येथे ‘आठवी-अ’च्या या स्नेहसंमेलन व बक्षीस वितरण सोहळा अगदी दिमाखात पार पडला. ‘मीडिया वन सोल्युशन्स’ प्रस्तुत, ‘कोरी पाटी’ प्रॉडक्शन व ‘इट्स मज्जा’ ओरिजिनल या वेबसीरिजची मनोरंजन विश्वात स्वतःची एक वेगळी ओळख निर्माण झाली आहे. नुकत्याच झालेल्या या स्नेहसंमेलन सोहळ्यात कलाकारांच्या डान्स व विविध स्किटने अगदी रंगत आणली.
या कार्यक्रमाला सिनेसृष्टीतील कलाकार मंडळीसह अनेक चाहते मंडळी उपस्थित होते. चाहत्यांच्या उपस्थितीवरुन या वेबसीरिजला मिळणारा भरघोस प्रतिसाद पाहायला मिळाला.या कार्यक्रमाला अगदी यवतमाळ, कोल्हापूर, सांगोला येथून चाहतेमंडळी सातारा येथे आले होते. यावरून वेबसीरिजसाठीचे चाहत्यांचे हे प्रेम पाहायला मिळत आहे. अगदी दिग्दर्शक मंडळींसह या वेबसीरिजच्या कलाकार मंडळी व क्रू टीमनेही धमाल, मस्ती केलेली पाहायला मिळाली. सोशल मीडियावरही या धमाल डान्सची झलक प्रचंड व्हायरल होताना दिसत आहे.
‘आठवी अ’ या सीरिजची कथा, संवाद व दिग्दर्शन नितीन पवार यांनी केले आहे. तर पटकथा नितीन वाडेवाले व नितीन पवार यांनी लिहिले आहे. या सीरिजच्या प्रत्येक भागाला प्रेक्षकांचा तूफान प्रतिसाद मिळत आहे. या सीरिजच्या एका भागाला तब्बल १४ लाख व्ह्यूज्स मिळाले आहेत. तर काही भागांनी लाखों व्ह्युजचा टप्पा पार केला.