Nupur Shikhare and Ira Khan Marriage : गेले काही दिवस बॉलिवूड विश्वात एकाच लग्नाची जोरदार चर्चा सुरु आहे आणि ते लग्न म्हणजे आयरा खान व नुपूर शिखरे या जोडीचं. मुंबईमधील ताज एंडस लँड या हॉटेलमध्ये या दोघांचे कायदेशीर पद्धतीने लग्न पार पडले. साध्या पद्धतीने हा विवाह सोहळा पार पडला असून आयरा-नुपूरच्या जवळच्या नातेवाईकांच्या व मित्रपरिवाराच्या उपस्थितीत हा विवाहसोहळा संपन्न झाला. त्यानंतर काल (१० जानेवारी) रोजी हे दोघे पुन्हा एकदा विवाहबंधनात अडकले आहेत. दोघांनी अगदी थाटामाटात आणि ख्रिश्चन पद्धतीने एकमेकांशी लग्न केलं. उदयपूरमध्ये दोघांचा शाही विवाहसोहळा पार पडला असून दोघांच्या लग्नाचे अनेक फोटो व व्हिडीओ सोशल मीडियावर व्हायरल होत आहेत.
सोशल मीडियावर व्हायरल होत असलेल्या फोटो व व्हिडीओमध्ये आयराने पांढरा शुभ्र गाऊन परिधान केला होता. तर त्यावर साजेसा साजशृंगार आणि लाइट मेकअप असलेला लूक केला होता. तर नुपूर शिखरे हा बेज रंगाच्या फॉर्मल सूटमध्ये खूपच डॅशिंग दिसत होता. आयरा-नुपूर एकमेकांचा हात पकडून लग्नासाठी येत असतानाचा व्हिडीओही सोशल मीडियावर चांगलाच व्हायरल होत आहे. दरम्यान, त्यांच्या एन्ट्रीला उपस्थित मंडळींनी दोघांवरही फुलांचा वर्षाव केला. यावेळी आपल्या लाडक्या लेकीला वधूच्या वेषात पाहून आमिर खानही भावूक झाला.
आयराने नुपूरबरोबर ख्रिश्चन रितीरिवाजानुसार लग्न केलं आहे. आयरा खान व नुपूर शिखरे यांनी लग्नबंधनात अडकल्यानंतर डान्स करत उपस्थित सर्वांचं लक्ष वेधून घेतलं. व्हायरल होत असलेल्या फोटो व व्हिडिओद्वारे नेटकऱ्यांनी दोघांवर शुभेच्छांचा वर्षाव केला आहे. आयरा-नुपूरने ख्रिश्चन पद्धतीने लग्न केल्यानंतर सोशल मीडियावर नेटकरी त्यांना शुभेच्छा देत आहेत. तर दुसरीकडे काही नेटकरी मंडळी त्यांना ट्रोलही करत आहेत.
दरम्यान, आयरा-नुपूर शिखरे यांचं लग्न पार पडल्यानंतर आता जियो वर्ल्ड सेंटरमध्ये त्यांचे ग्रँड रिसेप्शन पार पडणार आहे. या ग्रँड रिसेप्शनला बॉलिवूडचे अनेक सेलिब्रिटी हजेरी लावणार आहेत. येत्या १३ जानेवारी रोजी त्यांचं हे रिसेप्शन होणार असल्याचे म्हटले जात आहे.