‘आई कुठे काय करते’ या मालिकेमुळे घराघरांत लोकप्रिय झालेली अभिनेत्री म्हणजे अश्विनी महांगडे. यामध्ये तिने अनघा ही भूमिका साकारली आहे. सोशल मीडियावर अश्विनीचा चाहतावर्ग मोठ्या प्रमाणात आहे. अभिनयाप्रमाणेच ती तिची सामाजिक बांधिलकी सुद्धा आवर्जून जपते. अनघाचा समजूतदारपणा, स्पष्टवक्तपणा या सर्व पैलूंमुळे अनघा या भूमिकेला प्रेक्षकांनी आपलसं केलं आहे. अश्विनी मालिकेमुळे जितकी चर्चेत असते तितकीच ती तिच्या वैयक्तिक आयुष्यामुळेदेखील प्रकाशझोतात राहत असते. त्याचबरोबर अश्विनी समाजाप्रती असणारी जबाबदारीदेखील वेगवेगळ्या उपक्रमांच्या माध्यमातून पार पडत असते.
‘स्वराज्यरक्षक संभाजी’, ‘आई कुठे काय करते’ या मालिकांमुळे अश्विनी घराघरांत लोकप्रिय झाली. अशातच काही दिवसांपूर्वी तिने तिच्या हक्काचे नवीन घर घेतले. अश्विनी महांगडेची जवळची मैत्रीण माधुरी पोळने अभिनेत्रीच्या नव्या घराची पहिली झलक इन्स्टाग्राम स्टोरीवर शेअर केली होती. या फोटोमध्ये अभिनेत्रीच्या नव्या घराचा व्ह्यू आणि तिच्या हातात घराची किल्ली पाहायला मिळाली होती.
अश्विनी ही सोशल मीडियावर चांगलीच सक्रीय असते. सोशल मीडियावर ती तिचे अनेक फोटो व व्हिडीओ शेअर करत असते. अशातच तिने नुकत्याच शेअर केलेल्या एका व्हिडीओमध्ये तिच्या गावाकडच्या घराची झलक पाहायला मिळत आहे. साताऱ्यामधील पसरणी हे अभिनेत्रीचे गाव असून तिचे घर अगदी भव्यदिव्य आहे. एका फोटोशूटनिमित्त शेअर केलेल्या व्हिडीओमधून तिच्या घराची झलक पाहायला मिळत आहे. भव्य हॉल आणि आतमध्ये अनेक खोल्यांचे हे घर आहे.
अश्विनीच्या घराच्या हॉलमध्ये डाव्या बाजूला अनेक पुरस्कार व बक्षिसे ठेवण्यात आली आहेत. तसेच भिंतीवरील तलवारीनेदेखील सर्वांचे लक्ष वेधून घेतलं आहे. त्याचबरोबर तिच्या घरात छत्रपती शिवाजी महाराज यांची मोठी प्रतिमादेखील आहे. तसेच तिच्या ‘स्वराज्यरक्षक संभाजी’ या मालिकेतील भूमिकेचा एक फोटोही पाहायला मिळत आहे. आकर्षक रंग, आकर्षक इंटिरिअर व आकर्षक सजावटीच्या वस्तूंनी अश्विनीचे हे घर सजलेले आहे.
आणखी वाचा – असा पार पडला एजे-लीला यांचा रिसेप्शन सोहळा, जहागीरदारांनी शूटिंगसह मजामस्तीही केली अन्…, BTS व्हिडीओ समोर
दरम्यान, ‘आई कुठे काय करते’ या मालिकेतील अनघा असो किंवा ‘स्वराज्यरक्षक संभाजी’ मालिकेतील तिची ऐतहासिक भूमिका असो. अश्विनीने आपल्या प्रत्येक भूमिकेतून प्रेक्षकांचे चांगलेच मनोरंजन केलं आहे. लवकरच धर्मरक्षक अहिल्याबाई होळकर हा नवीन चित्रपट प्रेक्षकांच्या भेटीला येणार आहे. या चित्रपटाची सर्वजण आतुरतेने वाट पाहत आहे.
